अमरावती : अमरावतीच्या बेलोरा विमानतळावरून अलायन्स एअरचे पहिले प्रवासी उड्डाण १६ एप्रिलला होणार आहे. तिकिटाचा विचार करता सध्या अमरावती-मुंबई ७२ आसनी प्रवासी विमानाचे तिकीट हे २५०० ते ३३०० रुपयांपर्यंत आहे. भविष्यात तिकिटाला मागणी वाढली की, दर वाढू शकतात, असे विमानोड्डाण क्षेत्रातील तज्ज्ञांचे मत आहे. परंतु, विमान व सुपरफास्ट ट्रेनच्या तिकीट दराची तुलना केल्यास विमानाचा तिकीट दर कमी असून वेळही कमी लागतो. बडनेराहून मुंबईकडे जाणारी सुपरफास्ट एक्स्प्रेस दुरंतोच्या एसी प्रथम श्रेणी तिकिटापेक्षाही विमानाचे तिकीट स्वस्त असल्याचे दिसून येत आहे.

                          दुरंतोचे तिकीट २७५० रुपये आहे. ही सुपरफास्ट एक्स्प्रेस बडनेरा येथून मुंबईला ९ तास ३० मिनिटांत जाते. त्या तुलनेत विमान केवळ ४५ मिनिटांत मुंबई गाठते. चेक इन व चेक आऊटसाठी एक ते दीड तासाचा वेळ लागतो. तरी विमानाने कोणत्याही एक्स्प्रेसच्या तुलनेत वेगाने, कमी वेळात मुंबईला पोहोचता येणार आहे.