कांचन गडकरी यांना प्रयोगशील शेती पुरस्कार

                       वसंतराव नाईक प्रतिष्ठान आणि वनराई फाउंडेशनच्या संयुक्त वतीने मंगळवारी सौ. कांचन गडकरी यांना ज्येष्ठ कृषी शास्त्रज्ञ डॉ. सी. डी. मायी यांच्या हस्ते ‘प्रयोगशील शेती पुरस्कार २०२५’ प्रदान करण्यात आला. ३० हजार रुपये रोख, शाल, श्रीफळ व स्‍मृतिचिन्‍ह असे पुरस्‍काराचे स्‍वरूप होते. एनरीको हाइट्स कन्व्हेन्शन हॉल येथे झालेल्‍या या कार्यक्रमाच्या अध्यक्षस्थानी वनराई फाउंडेशनचे अध्यक्ष डॉ. गिरीश गांधी होते. यावेळी डॉ. पंजाबराव देशमुख कृषी विद्यापीठाचे कुलगुरु डॉ. शरदराव गडाख, माजी आमदार व वसंतराव नाईक प्रतिष्‍ठानचे अध्‍यक्ष ॲड. निलय नाईक, सचिव प्रगती पाटील, पर्यावरणतज्‍ज्ञ डॉ. अजय पाटील यांची प्रमुख उपस्थित होती.

                       धापेवाडा येथील शेतीमध्‍ये केंद्रीय मंत्री नितीन गडकरी यांच्‍या मार्गदर्शनात विविध प्रयोग करण्‍याची संधी मिळत असल्‍याचे कांचन गडकरी म्‍हणाल्‍या. आईकडून शेतीचा वारसा, सासूकडून मिळालेली कुटुंबाची साथ, सहकाऱ्यांचे सहकार्य यासोबतच पाणी, मृदा आणि वेळेचे योग्‍य व्‍यवस्‍थापन यामुळे विविध प्रयोग करता आले व त्‍यात यश मिळाले, असे त्‍यांनी सांगितले.

                     यावेळी डॉ. सी. डी. मायी, डॉ. शरदराव गडाख यांची समयोचित भाषणे झाली. अध्‍यक्षीय भाषणातून डॉ. गिरीश गांधी यांनी कांचन गडकरी या महिला आणि शेतकऱ्यांसाठी प्रेरणादायी उदाहरण असून नागपूर आणि विदर्भाला त्‍यांचा अभिमान असल्‍याचे गौरवोद्गार काढले. प्रास्‍ताविकातून ॲड. निलय नाईक यांनी नितीन गडकरी व कांचन गडकरी यांच्‍या कृषी क्षेत्रातील कार्याचा गौरव केला. डॉ. अजय पाटील यांनी कांचन गडकरी यांचा परिचय करून दिला. कार्यक्रमाचे सूत्रसंचालन प्रगती पाटील यांनी केले तर आभार बाळ कुळकर्णी यांनी मानले.