दबावाखाली झुकलेली क्रिकेट व्यवस्था?

केकेआरकडून बांगलादेशी खेळाडूची हकालपट्टी

बीसीसीआयच्या दुटप्पी भूमिकेवर गंभीर प्रश्न

मुंबई: आयपीएल २०२६ सुरू होण्यापूर्वीच कोलकाता नाइट रायडर्सने बांगलादेशी वेगवान गोलंदाज मुस्तफिजुर रहमानला संघातून मुक्त करण्याचा घेतलेला निर्णय हा केवळ क्रीडाविषयक नसून, तो गेल्या सहा–सात महिन्यांतील राजकीय, धार्मिक आणि भू-राजकीय दबावाचा थेट परिणाम असल्याचे स्पष्ट दिसत आहे. या निर्णयामागे बीसीसीआयची भूमिका आणि वेळ निवड पाहता, भारतीय क्रिकेट व्यवस्थेतील दुटप्पीपणा उघड झाला आहे.

बीसीसीआयचे सचिव देवजित सैकिया यांनी हा निर्णय “अलीकडील घडामोडी” लक्षात घेऊन घेतल्याचे सांगितले असले, तरी त्या घडामोडी नेमक्या कोणत्या, हे स्पष्ट न करता बीसीसीआयने जबाबदारी झटकण्याचाच प्रयत्न केला आहे. केकेआरनेही अधिक तपशील न देता मुस्तफिजुरला संघातून मुक्त केल्याची माहिती दिली.

ऑक्शनमध्ये कोट्यवधी, अवघ्या १८ दिवसांत बाहेर?

१६ डिसेंबर २०२५ रोजी दुबईत झालेल्या आयपीएल मिनी ऑक्शनमध्ये केकेआरने मुस्तफिजुर रहमानला तब्बल ९.२० कोटी रुपयांना विकत घेतले होते. त्या वेळी कोणताही ‘नैतिक’, ‘राष्ट्रीय’ किंवा ‘सुरक्षेचा’ मुद्दा उपस्थित झाला नव्हता. मात्र अवघ्या १८ दिवसांतच त्याच खेळाडूला संघाबाहेर काढले जाणे, हा निर्णय क्रिकेटच्या कसोटीवर नव्हे, तर दबावाच्या राजकारणावर आधारित असल्याचे चित्र निर्माण करतो.

निवडक भूमिका: आयपीएलसाठी बंदी, पण द्विपक्षीय मालिकांसाठी दार उघडे?

अजूनही अधिक गंभीर बाब म्हणजे, शुक्रवारीच बांगलादेश क्रिकेट बोर्डाने आपले वेळापत्रक जाहीर करत भारत सप्टेंबरमध्ये बांगलादेश दौऱ्यावर येणार असल्याचे सांगितले आहे—३ वनडे आणि ३ टी-२० सामने प्रस्तावित आहेत. म्हणजेच,

• आयपीएलमध्ये बांगलादेशी खेळाडू नको,

• पण द्विपक्षीय मालिकांसाठी बांगलादेश चालतो?

हा विरोधाभास बीसीसीआयच्या धोरणात्मक प्रामाणिकतेवरच प्रश्नचिन्ह उभे करतो. क्रिकेट हा खेळ आहे की राजकीय हत्यार, असा सवाल निर्माण होणे स्वाभाविक आहे.

‘परवानगी दिली होती, आता चकित आहोत’ — बांगलादेश बोर्ड

ढाक्यातील बांगलादेश क्रिकेट बोर्डाच्या एका वरिष्ठ अधिकाऱ्याने स्पष्ट शब्दांत सांगितले की,
“बीसीसीआयच्या विनंतीवरून आम्ही मुस्तफिजुरला आयपीएलसाठी परवानगी दिली होती. आता अचानक घेतलेल्या या निर्णयामुळे आम्ही चकित झालो आहोत.”

हा खुलासा बीसीसीआयच्या अंतर्गत संवादातील विसंगती आणि आंतरराष्ट्रीय क्रिकेटमधील विश्वासार्हतेला तडा जात असल्याचे दर्शवतो.

गेल्या काही महिन्यांचा पॅटर्न स्पष्ट

पाकिस्तानविरोधात हस्तांदोलन न करणे, ट्रॉफी स्वीकारण्यास नकार, आशिया चषकातील वागणूक, आता बांगलादेशी खेळाडूविरोधात कारवाई—हे सर्व वेगवेगळे प्रसंग वाटत असले, तरी त्यामागे एक ठरावीक निवडक धोरण दिसते.
राजकीय वातावरण बदलले की क्रिकेटचे नियमही बदलतात का, हा प्रश्न आता टाळता येणार नाही.

क्रिकेटचे नुकसान, भारताची प्रतिमा धोक्यात

या प्रकारांमुळे केवळ एका खेळाडूवर अन्याय होत नाही, तर भारतीय क्रिकेटची नैतिक उंची, विश्वासार्हता आणि जागतिक प्रतिमा यांनाही धक्का बसतो. खेळाडूंची निवड कामगिरीवर व्हावी की देशांतर्गत राजकीय दबावावर, हा मूलभूत प्रश्न पुन्हा एकदा समोर आला आहे.

आज मुस्तफिजुर बाहेर आहे. उद्या कोण?
जर क्रिकेटही ‘आपण-ते’ या चौकटीत अडकणार असेल, तर खेळ म्हणून त्याचा आत्माच संपुष्टात येईल.

Author: कामगार टाइम्स

0

0