“मुंबई कुणाच्या बापाची नाही” : मुख्यमंत्री फडणवीस

 महापालिका निवडणुकीच्या रणशिंगात फडणवीसांचा आक्रमक एल्गार

महायुतीच्या प्रचाराचा जोरदार शुभारंभ; ठाकरे बंधूंवर अप्रत्यक्ष हल्ला

मुंबई: मुंबई महापालिका निवडणुकीसाठी महायुतीने प्रचाराचा शंखनाद करताच राजकीय वातावरण तापले आहे. “मुंबई कुणाच्या बापाची मालमत्ता नाही आणि मुंबईला महाराष्ट्रापासून वेगळं करण्याची हिंमत कुणाच्या बापाच्या बापाच्या बापातही नाही,” अशा अत्यंत आक्रमक शब्दांत मुख्यमंत्री देवेंद्र फडणवीस यांनी उद्धव ठाकरे आणि राज ठाकरे यांच्यावर नाव न घेता घणाघाती टीका केली.

वरळी येथे झालेल्या प्रचारसभेत फडणवीस बोलत होते. यावेळी उपमुख्यमंत्री एकनाथ शिंदे आणि केंद्रीय मंत्री रामदास आठवले उपस्थित होते. या सभेतून महायुतीने मुंबईच्या निवडणूक रणांगणात थेट आणि संघर्षपूर्ण प्रवेश केल्याचे स्पष्ट झाले.

वारसा जन्माने नाही, कर्माने मिळतो

शिवसेनेतील फाटाफुटीवर भाष्य करताना फडणवीस म्हणाले,
“रक्ताचा वारसा जन्माने मिळतो, पण विचारांचा वारसा कर्माने मिळतो. बाळासाहेब ठाकरे यांच्या विचारांचा खरा वारसा आज एकनाथ शिंदे यांच्याकडे आहे,” असे सांगत त्यांनी ठाकरे गटावर थेट राजकीय आव्हान फेकले.

मुंबई महापालिकेच्या तिजोरीवर प्रश्नचिन्ह

मुंबई महापालिकेच्या सुमारे ७० हजार कोटी रुपयांच्या मुदत ठेवींवर बोट ठेवत फडणवीसांनी जुन्या सत्ताधाऱ्यांवर निष्क्रियतेचा आरोप केला.
“या रसिदी काय चाटण्यासाठी ठेवल्या होत्या का? गिरणी कामगार देशोधडीला लागला तेव्हा हे पैसे कुठे होते?” असा सवाल त्यांनी उपस्थित केला.

महायुती सरकारने बीडीडी चाळ पुनर्विकासाच्या माध्यमातून ८० हजार मराठी कुटुंबांना ५०० चौ.फुटांची घरे मोफत दिल्याचे सांगत, “आम्ही बिल्डरांच्या घशात जमीन घातली नाही, तर म्हाडाच्या माध्यमातून मराठी माणसाला न्याय दिला,” असा दावा त्यांनी केला.

“संविधान बदलण्याची भीती दाखवणाऱ्यांनाच जनता बदलेल”

केंद्रीय मंत्री रामदास आठवले यांनीही विरोधकांवर जोरदार हल्ला चढवला.
“संविधान बदलले जाईल, अशी भीती काँग्रेस पसरवत आहे. पण आता जनता काँग्रेसला सत्तेतून बदलल्याशिवाय राहणार नाही,” असे त्यांनी ठणकावून सांगितले.

विकासाचे श्रेय चोरण्याचा प्रयत्न?

मुंबईतील पायाभूत सुविधांच्या कामांवरून फडणवीसांनी विरोधकांवर ‘श्रेय चोरण्याचा’ आरोप केला.
“मुंबईत सध्या श्रेय लाटणारी एक टोळी सक्रिय आहे. कोस्टल रोड, मेट्रो, बीडीडी चाळींचा विकास आम्ही केला, हे मुंबईकरांना माहीत आहे. मात्र प्रत्येक विकासकामात अडथळे आणण्याचं काम उद्धव ठाकरेंनी केलं,” असा थेट आरोप त्यांनी केला.

निवडणूक लढाई अधिक तीव्र होणार

या सभेमुळे स्पष्ट झाले आहे की मुंबई महापालिका निवडणूक केवळ विकासकामांवर नव्हे, तर मराठी अस्मिता, वारसा, विश्वासार्हता आणि सत्तेच्या हक्कावर लढली जाणार आहे. फडणवीसांच्या आक्रमक भाषणामुळे प्रचाराची पातळी उंचावली असून, येत्या काळात मुंबईचे राजकारण आणखी तापण्याची चिन्हे स्पष्ट दिसत आहेत.

Author: कामगार टाइम्स

0

0