लाडकी बहीण योजनेत वर्षाअखेरीचा हफ्ता जमा, पण अपेक्षांना मर्यादा

लाडकी बहीण योजनेत वर्षाअखेरीचा हफ्ता जमा, पण अपेक्षांना मर्यादा

फक्त नोव्हेंबरचे 1500 रुपये खात्यात, डिसेंबर–जानेवारीबाबत संभ्रम कायम

मुंबई : राज्यातील लाखो महिलांसाठी दिलासादायक पण काहीसा निराशाजनक अशी बातमी समोर आली आहे. मुख्यमंत्री माझी  योजनेअंतर्गत पात्र महिलांच्या बँक खात्यांमध्ये नोव्हेंबर महिन्याचा 1500 रुपयांचा हफ्ता जमा करण्यात आला आहे. बुधवारी सायंकाळपासून अनेक महिलांच्या खात्यात ही रक्कम जमा झाल्याचे दिसून आले.

नोव्हेंबर आणि डिसेंबर या दोन महिन्यांचे हफ्ते प्रलंबित असल्याने वर्षअखेरीस 3000 रुपये किंवा जानेवारीसह 4500 रुपये मिळतील, अशी अपेक्षा महिलांना होती. मात्र प्रत्यक्षात फक्त एकच हफ्ता (1500 रुपये) जमा झाल्याने अनेक लाभार्थी महिलांमध्ये नाराजी व्यक्त होत आहे.

महागाई वाढलेली असताना आणि वर्षाअखेरीस घरगुती खर्च जास्त असताना अपेक्षेपेक्षा कमी रक्कम मिळाल्याने महिलांचा अपेक्षाभंग झाला आहे. डिसेंबर महिना संपत असतानाही त्याचा हफ्ता न मिळाल्याने उर्वरित रक्कम कधी मिळणार? असा सवाल महिलांकडून विचारला जात आहे.

ई-केवायसी न केल्यास हफ्ता बंद होण्याचा धोका

लाडकी बहीण योजनेत ई-केवायसी हा अत्यंत महत्त्वाचा मुद्दा ठरला आहे. ई-केवायसीची अंतिम तारीख 31 डिसेंबर होती. ज्यांनी मुदतीत ई-केवायसी पूर्ण केली नाही, आधार बँक खात्याशी लिंक नाही किंवा कागदपत्रे अपूर्ण आहेत, अशा महिलांचा योजनेचा लाभ बंद होण्याची शक्यता आहे.

सरकारच्या नियमांनुसार, अशा महिलांना 2026 पासून 1500 रुपयांचा मासिक हफ्ता मिळणार नाही, असा इशारा देण्यात येत आहे.

एसएमएस आला नाही तरी घाबरू नका

अनेक महिलांना खात्यात पैसे जमा झाल्याचा एसएमएस न आल्याच्या तक्रारी समोर आल्या आहेत. मात्र तांत्रिक अडचणी, बँक सर्व्हर किंवा नेटवर्क समस्यांमुळे संदेश उशिरा येऊ शकतो. त्यामुळे एसएमएस आला नाही म्हणून घाबरू नये.

महिलांनी:

• बँक पासबुक अपडेट करावे

• मोबाईल बँकिंग / UPI अ‍ॅप तपासावे

• एटीएममधून मिनी स्टेटमेंट काढावे

यातून खात्यात रक्कम जमा झाली आहे का, याची खात्री करावी.

डिसेंबर आणि जानेवारीच्या हफ्त्यांबाबत अनिश्चितता कायम

एकूणच, नोव्हेंबर महिन्याचा हफ्ता मिळाल्याने काहीसा दिलासा मिळाला असला, तरी डिसेंबर आणि जानेवारी महिन्यांच्या हफ्त्यांबाबत अजूनही स्पष्टता नाही. ई-केवायसी न केलेल्या महिलांचे पुढे काय होणार, याकडे संपूर्ण राज्याचे लक्ष लागले आहे.

महिलांचा संभ्रम दूर होण्यासाठी शासनाने पुढील हफ्ते, मुदतवाढ आणि नियमांबाबत स्पष्ट घोषणा करावी, अशी जोरदार मागणी होत आहे.

Author: कामगार टाइम्स

0

0