विरोधकांचा सरकारला घेराव – सत्ताधाऱ्यांचा जोरदार प्रतिवाद

नागपूर : राज्य सरकारची महत्त्वाकांक्षी ‘मुख्यमंत्री माझी लाडकी बहीण’ योजना बुधवारी पुन्हा एकदा हिवाळी अधिवेशनात चर्चेच्या केंद्रस्थानी राहिली. योजनेतील कथित अनियमितता, केवायसी प्रक्रियेमधील अडचणी आणि बोगस लाभार्थी यावरून सत्ताधारी आणि विरोधकांमध्ये तीव्र वादावादी झाली. यावेळी मंत्री आदिती तटकरे आणि काँग्रेस नेते नाना पटोले यांच्यात जोरदार खडाजंगी झाली, तर उपमुख्यमंत्री एकनाथ शिंदे यांनी विरोधकांना कडक शब्दांत प्रत्युत्तर दिले.

विरोधकांचे आरोप : “जनतेचा पैसा, हिशोब द्यायलाच हवा”

योजनेत मोठा गैरव्यवहार झाल्याचा आरोप काँग्रेसचे नेते नाना पटोले यांनी केला.
त्यांच्या मते —

• आशा वर्कर, अंगणवाडी सेविका आणि ग्रामसेवकांना फॉर्म भरण्याचे टार्गेट देण्यात आले.

• यामुळे अनेक ठिकाणी बोगस फॉर्म भरले गेले.

• योजनेत मोठी गडबड असून सरकारने जनतेच्या पैशाचा हिशोब द्यावा.

राष्ट्रवादी काँग्रेस (शरद पवार गट) चे आमदार जयंत पाटील यांनीही सरकारवर निशाणा साधत विचारले की, “योजनेच्या अटी सुरुवातीला जाहीर का करण्यात आल्या नाहीत? चुकीचा लाभ घेणाऱ्यांवर कारवाई होणार का?” त्यांनी KYC प्रक्रिया अचानक सुरू केल्याचा प्रश्नही उपस्थित केला.

सरकारची बाजू : “विरोधक अनाठायी संभ्रम निर्माण करत आहेत”

विरोधकांच्या आरोपांना उत्तर देताना महिला व बालकल्याण मंत्री आदिती तटकरे यांनी योजनेची पारदर्शकता अधोरेखित केली.
त्यांनी सांगितले की —

• नावनोंदणीसाठी सक्षम पोर्टलसोबतच ऑफलाईन सुविधाही उपलब्ध होत्या.

• पहिल्या शासन निर्णयानंतर २ कोटी ६३ लाख लाभार्थ्यांची पडताळणी सुरू करण्यात आली आहे.

• ई-KYC प्रणाली लागू करून इतर विभागातील माहितीचीही तपासणी केली जात आहे.

KYC लागू करण्यामागील कारण स्पष्ट करताना तटकरे म्हणाल्या की, “अनेक महिलांच्या नावावर बँक खाती नसल्यामुळे पैशांसाठी त्यांनी घरातील पुरुषांचे खाते वापरले. त्यामुळेच KYC आवश्यक ठरले.”

तटकरे यांनी हेही स्पष्ट केले की —

• पुरुषांच्या खात्यावर जमा झालेल्या रकमांची तपासणी सुरू आहे.

• चुकीचा लाभ घेतल्याचे आढळल्यास निश्चीत कारवाई केली जाईल.

उपमुख्यमंत्री शिंदेंचा विरोधकांवर पलटवार

विरोधकांच्या टीकेला उत्तर देताना उपमुख्यमंत्री एकनाथ शिंदे यांनी आक्रमक भूमिका घेतली.
नाना पटोले यांच्यावर टीका करत ते म्हणाले —
“तुम्ही सुरुवातीपासूनच या योजनेला विरोध केला. त्याचा परिणाम म्हणूनच लाडक्या बहिणींनी तुम्हाला निवडणुकीत पराभूत केले. पुन्हा विरोध करत राहिलात तर भविष्यातही त्याच बहिणी तुम्हाला घरी बसवतील.”

महिलांना देण्यात येणाऱ्या २१०० रुपयांच्या वाढीव सहाय्याबाबत शिंदे यांनी स्पष्ट केले की,
“सरकार शब्द पाळेल. योग्य वेळ आल्यावर हा लाभ लाडक्या बहिणींना दिलाच जाईल.”

Author: कामगार टाइम्स

0

0