जम्मू : रविवारी संध्याकाळी ६:३० वाजता जम्मूच्या कठुआ येथील नियंत्रण रेषेजवळ (LoC) हिरानगर सेक्टरमध्ये दहशतवादी आणि सुरक्षा दलांमध्ये चकमक झाली. सुमारे तीन तास चाललेली ही चकमक कमी दृश्यमानतेमुळे थांबवण्यात आली. सकाळी पुन्हा ऑपरेशन सुरू होईल. परिसरात अतिरिक्त सुरक्षा दल तैनात करण्यात आले आहे.

                         या भागात सुरक्षा दलांची तैनाती वाढवण्यात आली आहे. याशिवाय, या भागाला लागून असलेल्या पंजाबमधील जिल्ह्यांनाही हाय अलर्टवर ठेवण्यात आले आहे. नियंत्रण रेषेपासून सुमारे ५ किमी अंतरावर असलेल्या सान्याल गावात ४-५ दहशतवादी लपल्याची माहिती अधिकाऱ्यांनी दिली. यानंतर परिसरात शोध मोहीम राबवण्यात आली. त्यानंतर दहशतवाद्यांनी गोळीबार सुरू केला.

                          मीडिया रिपोर्ट्सनुसार, दहशतवाद्यांनी मुलीला आणि तिच्या पालकांना ताब्यात घेतले होते. संधी मिळताच त्या महिलेने तिच्या मुलीला घेऊन पळून जायला सुरुवात केली. दहशतवाद्यांनी तिला गोळ्या घालण्याची धमकी दिली, पण दोघेही पळत राहिले. यानंतर महिलेचा पतीही दहशतवाद्यांच्या तावडीतून सुटला. यावेळी मुलीला किरकोळ दुखापत झाली.