मंगळवारी महाराष्ट्रातील छत्रपती संभाजीनगर, जालना आणि बीड जिल्ह्यातील धरणांमधून मुसळधार पाऊस आणि पाणी सोडण्यात आल्यामुळे गोदावरी नदीकाठी पूरसदृश परिस्थिती निर्माण झाली आहे. सोमवार रात्रीपासून छत्रपती संभाजीनगर आणि बीडमध्ये मुसळधार पाऊस पडत आहे. महसूल अधिकाऱ्यांनी सांगितले की, काही भागात ढगफुटी झाल्यासारखे वाटत होते. छत्रपती संभाजीनगरमधील जायकवाडी धरण आणि बीडमधील माजलगाव धरण जवळजवळ भरले आहे. दोन्ही धरणांमधून सतत पाणी सोडले जात आहे.

                         मराठवाडा आणि विदर्भात झालेल्या अतिवृष्टीमुळे शेतकऱ्यांचे मोठे नुकसान झाले होते. या नुकसानीच्या पाहणीनंतर आता राज्य सरकारने शेतकऱ्यांना मोठा दिलासा दिला आहे. खरीप 2025 मधील पिकांच्या नुकसानीसाठी 2215 कोटी रुपयांची मदत जाहीर करण्यात आली आहे. मदत आणि पुनर्वसन विभागाने याबाबतचा शासन निर्णय आजच जाहीर केला असून, ही रक्कम लवकरच वितरीत केली जाणार आहे.

                          गेल्या काही दिवसांत झालेल्या अतिवृष्टीने राज्यातील अनेक जिल्ह्यांमध्ये पिकांचे मोठ्या प्रमाणात नुकसान झाले. यामध्ये मराठवाड्यासह विदर्भातील शेतकरी सर्वाधिक बाधित झाले होते. सरकारने केलेल्या पंचनाम्यानुसार, एकूण 31 लाख 64 हजार शेतकऱ्यांचे मोठे नुकसान झाल्याचे समोर आले आहे. या शेतकऱ्यांना मदत देण्यासाठी सरकारने तातडीने पाऊल उचलले आहे.

दिवाळीपूर्वी शेतकऱ्यांना नुकसान भरपाई – कृषीमंत्री भरणे

                         अतिवृष्टी ग्रस्त शेतकऱ्यांना दिवाळीपूर्वी नुकसान भरपाई देणार आहोत. ज्या शेतकऱ्यांचे पशुधन वाहून गेले आहे त्यांनाही मदत केली जाणार आहे. जवळपास 70 लाख एकर शेतीचे नुकसान झाले आहे. मुख्यमंत्र्यांनी पंचनामे करण्याचे आदेश दिल्याची माहिती कृषिमंत्री दत्तात्रय भरणे यांनी दिली आहे.