“राष्ट्रीय सेवा योजना ही विद्यार्थ्यांच्या माध्यमातून समाज उन्नतीची प्रभावी चळवळ” – दीपेंद्र लोखंडे

“राष्ट्रीय सेवा योजना ही विद्यार्थ्यांच्या माध्यमातून समाज उन्नतीचे मोठे व्यासपीठ”

नागपूर – “राष्ट्रीय सेवा योजना ही विद्यार्थी तत्वातून समाज उन्नतीचा प्रभावी आणि उत्तम उपक्रम असून युवकांना राष्ट्रनिर्मितीत सक्रिय होण्यासाठी राष्ट्रीय सेवा योजना मोठे व्यासपीठ उपलब्ध करून देते,” असे प्रतिपादन विभागीय सहसंचालक दीपेंद्र लोखंडे यांनी संताजी महाविद्यालय, नागपूर येथे शिक्षण उपसंचालक कार्यालयाच्या मार्गदर्शनाखाली आयोजित राष्ट्रीय सेवा योजनेच्या विशेष सभेत मार्गदर्शन करताना केले.

कार्यक्रमाच्या अध्यक्षस्थानी महाविद्यालयाच्या प्राचार्या प्रा. डॉ. सौ. प्रिया वंजारी तर विभागीय समन्वयक प्रा विलास बैलमारे, सहाय्यक विभागीय समन्वयक प्रा रवींद्र गुजरकर व कार्यक्रम अधिकारी प्रक्षणजय लिपटे प्रामुख्याने मंचावर उपस्थित होते.

कार्यक्रमाची सुरुवात रा से यो च्या गीताने झाली. कार्यक्रमाचे प्रास्ताविक व अहवाल वाचन प्रा रवींद्र गुजरकर यांनी केले. रा से यो नागपूर विभागाने गेल्या 2 वर्षात अनेक नाविन्यपूर्ण उपक्रम राबवून विभागाचे नावलौकिक केले असे प्रास्ताविकातून व्यक्त केले. विभागीय समन्वयक विलास बैलमारे यांनी “राष्ट्रीय सेवा योजनेचे विद्यार्थी जीवनातील महत्त्व” या विषयावर सविस्तर मार्गदर्शन करत रा से यो कसे विद्यार्थ्यांमध्ये नेतृत्व, शिस्त, संवेदनशीलता आणि सामाजिक बांधिलकी विकसित करते यावर भर दिला.
याप्रसंगी नागपूर विभागातील जिल्हा समन्वयक प्रा विवेक देशमुख, प्रा भालचंद्र लोडे, प्रा चंद्रशेखर गिरडे, प्रा गणेश भदाडे व प्रा विजय मेश्राम यांनी जिल्हानिहाय मनोगत व्यक्त केले. रा से योच्या विविध उपक्रमांद्वारे विद्यार्थी समाजातील वास्तव समस्यांना जवळून समजून घेतात, असे मतही त्यांनी मांडले.

कार्यक्रमाचे संचालन कार्यक्रम अधिकारी प्रा. नीता राठोड यांनी केले, तर अतिथींचे आभार सहाय्यक कार्यक्रम अधिकारी प्रफुल कामडी यांनी मानले. सभेची सांगता वंदे मातरम या सामूहिक गानाने करण्यात आली. सभेच्या यशस्वी ते करिता संताजी महाविद्यालयातील शिक्षक व शिक्षकेतर कर्मचारी यांनी अथक परिश्रम घेतले.

Author: कामगार टाइम्स