गोंदिया : गोंदिया जिल्ह्यात देवरी तालुक्यातील चिचगडकडून भरधाव वेगात येणाऱ्या अनियंत्रित कारने रस्त्यालगत असलेल्या बीजाच्या झाडाला जोरात धडक दिली. त्यामुळे कारमधील दोन जण जागीच ठार झाले, तर एक जण गंभीर जखमी झाला. मंगळवारी, 1 जुलै रोजी पहाटे साडेचारच्या सुमारास देवरी तालुक्यातील परसटोला शिवारात ही घटना घडली. अपघात इतका भीषण होता की, गॅस वेल्डिंगने कटिंग करून मृतास व जखमीस कारच्या बाहेर काढावे लागले.

                      राजा भारती (वय 35), सोहेल शेख (वय 32) असे या अपघातातील मृताचे नाव आहे. तर सलमान शेख (वय 25) असे गंभीर जखमी झालेल्या तरुणाचे नाव आहे. अपघातात कारची धडक इतकी जबर होती की, कार पूर्ण चक्काचूर झाली. पहाटेची घटना असल्यामुळे तीन तासानंतर मदत मिळाली.

                     पोलिसांनी दिलेल्या माहितीनुसार देवरी शहरातील तीन तरुण कारने (सी. जी. 08 आर 6255) देवरी चिचगड मार्गावरून देवरीकडे येत होते. चालकाचे परसटोला शिवारातील वन विभागाच्या नाक्याजवळ स्टेरिंगवरील नियंत्रण सुटले. त्यामुळे कार रस्त्यालगत असलेल्या बीजाच्या झाडाला जाऊन धडकली. या अपघातात कार चालक व चालकाच्या शेजारच्या सिटवर बसलेला तरुण जागीच ठार झाले. मागच्या सिटवर बसलेला तरुण समोरच्या व मागच्या सिटमध्ये अडकला. मृत व जखमी देवरीचेच रहिवाशी आहेत.

                     अपघातात सलमान शेख या तरुणाचे पायाचे हाड मोडले. देवरी शहरालगत अपघात झाल्याने पोलीस तसेच नागरिकांनी तात्काळ घटनास्थळी धाव घेतली. घटनास्थळी गोळा झालेल्या नागरिकांनी कारमधील लोकांना बाहेर काढण्यासाठी शर्तीचे प्रयत्न केले. मात्र, त्यांना बाहेर काढता येत नव्हते. त्यामुळे गॅस वेल्डिंगने कटिंग करून, मृतास व जखमीस पोलीस कर्मचारी व नागरिकांनी बाहेर काढले. जखमींना 108 रुग्णवाहिकेने रुग्णालयात दाखल करण्यात आले.

                     देवरी येथील ग्रामीण रुग्णालयात प्राथमिक उपचार करून जखमी तरुणाला पुढील उपचाराकरिता गोंदिया जिल्हा सामान्य रुग्णालयात पाठवण्यात आले आहे. अपघातातील दोन्ही मृतांना देवरी ग्रामीण रुग्णालयात उत्तरीय तपासणी करिता पाठवण्यात आले आहे. देवरी पोलिसांनी सदर प्रकरण नोंद केले असून पुढील तपास देवरीचे पोलीस निरीक्षक डांगे यांच्या मार्गदर्शनात सहाय्यक पोलीस निरीक्षक गेडाम व पोलीस शिपाई करंजेकर करीत आहेत.