मुंबई : महाराष्ट्राचे नवे राज्यपाल म्हणून आचार्य देवव्रत यांनी आज पदाची शपथ घेतली. राजभवनात पार पडलेल्या या शपथविधी सोहळ्यात मुख्यमंत्री देवेंद्र फडणवीस, उपमुख्यमंत्री एकनाथ शिंदे, मंत्रीमंडळातील काही मान्यवर तसेच वरिष्ठ अधिकारी उपस्थित होते. मुंबई उच्च न्यायालयाचे मुख्य न्यायमूर्ती यांनी आचार्य देवव्रत यांना पदाची शपथ दिली.

                        आचार्य देवव्रत यांचा प्रशासकीय आणि सामाजिक क्षेत्रातील दीर्घ अनुभव लक्षात घेता त्यांच्याकडून राज्यपालपदाची जबाबदारी समर्थपणे पार पडेल, असा विश्वास यावेळी मान्यवरांनी व्यक्त केला. शपथविधीनंतर देवव्रत यांनी राज्याच्या सर्वांगीण विकासासाठी सहकार्य करण्याचे म्हटले आहे. यानंतर राज्यपाल भवनात अधिकृत सत्काराचा कार्यक्रमही पार पडला.

                         महाराष्ट्राच्या राज्यपाल पदाचा अतिरिक्त कार्यभार स्वीकारण्यासाठी गुजरातचे राज्यपाल आचार्य देवव्रत यांचे रविवारीच मुंबई येथे सपत्नीक आगमन झाले. अहमदाबाद येथून तेजस एक्स्प्रेसने आलेल्या राज्यपालांचे तसेच त्यांच्या पत्नी दर्शना देवी यांचे मुख्यमंत्री देवेंद्र फडणवीस व उपमुख्यमंत्री एकनाथ शिंदे यांनी पश्चिम रेल्वेच्या मुंबई सेंट्रल स्थानकावर पुष्पगुच्छ देऊन स्वागत केले. यावेळी राज्यपालांना मुंबई सेंट्रल रेल्वे स्थानकावर रेल्वे पोलिसांतर्फे मानवंदना देण्यात आली तर राजभवन येथे पोहोचल्यावर मुंबई पोलिसांतर्फे मानवंदना देण्यात आली.

राष्ट्रपतींनी अतिरिक्त कार्यभार सोपवला

                         उपराष्ट्रपती म्हणून निवड झाल्यानंतर सीपी राधाकृष्णन यांनी महाराष्ट्राच्या राज्यपालपदाचा राजीनामा दिला. त्यानंतर राष्ट्रपती द्रौपदी मुर्मू यांनी गुजरातचे राज्यपाल आचार्य देवव्रत यांच्याकडे महाराष्ट्राच्या राज्यपालपदाचा अतिरिक्त कार्यभार सोपवला. आयएएनएसच्या वृत्तानुसार, राष्ट्रपतींचे प्रेस सचिव अजय कुमार सिंह यांनी 11 सप्टेंबर रोजी एक अधिकृत आदेश जारी केला. यात म्हटले आहे की, महाराष्ट्राच्या राज्यपालांच्या सध्याच्या कर्तव्यांव्यतिरिक्त त्यांची कामे पार पाडण्यासाठी ही नियुक्ती करण्यात आली आहे.