आंबिया बहराच्या संत्र्याची गळती होऊन राहिलेला संत्रा कवडीमोल भावाने विकावा लागला, तर दुसरीकडे तालुक्यातील संत्रा बागांवर मृग बहार संत्रा नसल्याने शेतकरी अडचणीत सापडला आहे. कृषी कर्ज भरण्याकरिता अवघे काही दिवस शिल्लक आहेत. शेतकऱ्यांना कृषी कर्ज भरायचे असल्याने त्याकरिता या अनुदानाची रक्कम मिळेल व आपल्या जवळील काही रक्कम टाकून कर्जाची परतफेड करता येईल, असा विचार संत्रा उत्पादक शेतकऱ्यांनी केला होता. परंतु, शासनाने त्यांच्या विचारांवर पाणी फेरले.

                          वरुड तालुक्यातील शेतकऱ्यांसाठी तहसील कार्यालयाकडून अपलोड केलेल्या शेतकऱ्यांची संख्या एकूण १४,३५१ आहे. त्यासाठी अनुदानित रक्कम ५३ कोटी ६५ लक्ष ३८ हजार २७४ रुपये आहे. यामध्ये ई-केवायसी केलेल्या शेतकऱ्यांची संख्या १२,३१५ असून यासाठी लागणारी अनुदानित रक्कम ४६ कोटी ४१ लक्ष ५९ हजार ७३४ रुपये आहे. ज्या शेतकऱ्यांनी अद्यापही ई-केवायसी केलेली नाही, त्यांची संख्या २,०३६ आहे. त्यांची अनुदानित रक्कम ७ कोटी २३ लक्ष ७८ हजार ५४० रूपये आहे.

अनुदानाअभावी शेतकरी सापडला अडचणीत :

                        ई-केवायसी केल्यावरही अनुदान रखडल्याने आधीच मेटाकुटीस आलेल्या शेतकऱ्यांना या अनुदानासाठी तहसील कार्यालयात हेलपाटे मारावे लागत आहे. याविषयी माहिती घेतली असता, अद्यापही शासनाकडून फळगळचे अनुदान आले नाही. त्यामुळे शेतकऱ्यांचे अनुदान थांबले असल्याची माहिती वरुड तहसील कार्यालयाकडून देण्यात आली.