मुख्यमंत्री माझी लाडकी बहिण योजनेच्या ई-केवायसीची अंतिम मुदत वाढवली
ई-केवायसी 31 डिसेंबरपर्यंत – लाडक्या बहिणींना मोठा दिलासा
मुंबई : मुख्यमंत्री माझी लाडकी बहिण योजनेअंतर्गत लाभार्थी महिलांसाठी सुरू असलेली ई-केवायसी प्रक्रिया मोठ्या प्रमाणावर सुरू असताना, नैसर्गिक आपत्ती आणि तांत्रिक अडचणींचा विचार करून राज्य सरकारने मोठा दिलासा दिला आहे. आधी निश्चित केलेली १८ नोव्हेंबर २०२५ ही अंतिम मुदत वाढवून आता ३१ डिसेंबर २०२५ पर्यंत करण्याचा निर्णय घेण्यात आला असल्याची माहिती राज्याच्या महिला व बाल विकास मंत्री आदिती तटकरे यांनी दिली.
मंत्री तटकरे म्हणाल्या की, अलीकडील नैसर्गिक आपत्तीमुळे अनेक कुटुंबांना मोठे नुकसान सहन करावे लागले असून काही लाभार्थी महिलांच्या पती किंवा वडिलांचे निधन झाल्याने संबंधित आधार क्रमांकावर ओटीपी प्राप्त करणे शक्य होत नाही. त्यामुळे ई-केवायसी प्रक्रिया पूर्ण करण्यात अडथळे निर्माण झाले होते. या सर्व परिस्थितीचा गंभीर विचार करून मुदतवाढ देण्यात आली आहे.
सरकारने स्पष्ट केले की, ज्या पात्र महिलांचे पती किंवा वडील हयात नाहीत किंवा ज्या महिला घटस्फोटित आहेत, त्यांनी स्वतःची ई-केवायसी प्रक्रिया पूर्ण करून मृत्यू प्रमाणपत्र, घटस्फोट प्रमाणपत्र किंवा न्यायालयीन आदेशाची सत्यप्रत सादर करणे आवश्यक राहील.
“कोणतीही पात्र महिला तांत्रिक, वैयक्तिक किंवा अपरिहार्य कारणांमुळे योजनेपासून वंचित राहू नये, हा शासनाचा स्पष्ट हेतू असून मुख्यमंत्र्यांच्या तसेच उपमुख्यमंत्र्यांच्या मार्गदर्शनाखाली हा निर्णय घेण्यात आला आहे,” असेही तटकरे यांनी सांगितले.
सरकारने विस्तारित कालावधीत सर्व पात्र महिलांनी लवकरात लवकर आपली ई-केवायसी प्रक्रिया पूर्ण करण्याचे आवाहन केले आहे.
0
0
