नागपूर – प्रतिनिधी : भाजपने पैसे वाटून बिहार निवडणूक जिंकली, असा राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी केलेला आरोप मुख्यमंत्री देवेंद्र फडणवीस यांनी जोरदार शब्दांत फेटाळून लावला आहे. “जो जीते वही सिकंदर. पराभव स्वीकारण्याची आणि आत्मपरीक्षण करण्याची ताकद विरोधकांत नाही. ते जोपर्यंत आत्मपरीक्षण करणार नाहीत, तोपर्यंत त्यांची मातीच होत राहील,” अशा शब्दांत त्यांनी पवारांना प्रत्युत्तर दिले.

                        शरद पवारांनी शनिवारी बारामतीत बोलताना बिहार निवडणुकीत एनडीएच्या विजयाचे श्रेय महिलांना देण्यात आलेल्या प्रत्येकी 10 हजार रुपयांना दिले होते. त्यांच्या या विधानाने राज्यात राजकीय चर्चा चांगल्याच तापल्या आहेत. याच पार्श्वभूमीवर फडणवीस नागपूरात पत्रकारांशी बोलत होते.

‘आम्ही योजना केल्या, लोकांनी पसंत केल्या’

                        मुख्यमंत्री म्हणाले, “विरोधकांचे सरकार असताना त्यांना योजनांची संधी होती, पण त्यांनी काही केले नाही. आम्ही योजना राबवल्या, त्या लोकांना आवडल्या आणि लोकांनी आम्हाला मतदान केले. त्यामुळे लोकांना दोष देण्याचे कारण नाही.” पराभवानंतर स्वतःच्या चुका कबूल करणे व आत्मपरीक्षण करणे आवश्यक असल्याचे त्यांनी स्पष्ट केले.

मुंबईत महायुतीचाच महापौर – फडणवीसांचा दावा

                        काँग्रेसने मुंबई महापालिका निवडणूक स्वबळावर लढवण्याची घोषणा केल्यानंतरही फडणवीस आश्वस्त दिसले. त्यांनी म्हटले, “विरोधक कसे लढतात हा त्यांचा मुद्दा. मुंबईच्या जनतेचा महायुतीवर विश्वास आहे. महापौरही महायुतीचाच असेल.”

शरद पवारांचा आरोप नेमका काय?

बारामतीत बोलताना शरद पवार म्हणाले होते की—

• “बिहारमध्ये महिलांच्या खात्यात सरकारने 10 हजार रुपये जमा केले. त्यामुळे महिलांनी मोठ्या प्रमाणात मतदान केले आणि त्याचा परिणाम म्हणून एनडीएला विजय मिळाला.”

• महाराष्ट्रातही निवडणुकीपूर्वी ‘लाडकी बहीण’ योजनेतून अधिकृतपणे पैशांचे वाटप करण्यात आले, असा त्यांनी उल्लेख केला.

• “येणाऱ्या निवडणुकांत सत्ताधारी पक्षांनी पैशांचे अधिकृत वाटप केले, तर लोकशाहीवरील विश्वास डळमळेल. निवडणूक आयोगानेही याचा गंभीर विचार करावा,” असे त्यांनी म्हटले.

राज्यातील सत्ताधारी आणि विरोधक यांच्यातील हा आरोप-प्रत्यारोपांचा संघर्ष येणाऱ्या निवडणुकांना रंगत आणणारा ठरत आहे.