कारंज्यात मॉडेल हायस्कूलच्या विद्यार्थ्यांना आपत्ती व्यवस्थापनाचे धडे
का टा वृत्तसेवा I परमानंद मुदगल
कारंजा (घा.) – तालुका प्रतिनिधी : आपत्तीच्या प्रसंगी नागरिकांनी संयम राखून योग्य निर्णय घेतला तर जीवितहानी टाळता येऊ शकते, याबाबत विद्यार्थ्यांमध्ये जनजागृती व्हावी यासाठी राष्ट्रीय आपत्ती प्रतिसाद दल (एनडीआरएफ) यांच्या मार्फत मॉडेल हायस्कूलच्या विद्यार्थ्यांसाठी आपत्ती निवारण प्रशिक्षण शिबिराचे आयोजन करण्यात आले. हे शिबिर मॉडेल वरिष्ठ महाविद्यालय, कारंजा येथे पार पडले.
शिबिराचे उद्घाटन प्राचार्य संजय धनवटे यांच्या हस्ते झाले. या प्रसंगी मॉडेल हायस्कूलचे मुख्याध्यापक विनोद कहारे, एनडीआरएफचे डेप्युटी कमांडेंट अशोक कुमार शृंखला, जेष्ठ निरीक्षक जी.डी. ब्रिजेश कुमार यादव आणि सहाय्यक निरीक्षक बिरेंद्रकुमार जयस्वाल उपस्थित होते.
प्रशिक्षकांनी विद्यार्थ्यांना भूकंप, पूर, आग, अपघात यांसारख्या आपत्तींच्या वेळी घ्यावयाच्या तात्काळ उपाययोजना समजावून सांगितल्या. तसेच अग्निशमनाची साधी उपकरणे कशी वापरायची, जखमी व्यक्तींना सुरक्षित स्थळी कसे हलवायचे, तसेच सीपीआर (हृदय-श्वसन पुनर्जीवन) तंत्राची प्रत्यक्ष प्रात्यक्षिके विद्यार्थ्यांना दाखवण्यात आली.
विद्यार्थ्यांनी उत्साहाने प्रशिक्षणात सहभाग घेत अनेक शंका दूर केल्या. या उपक्रमामुळे त्यांच्यात आपत्ती व्यवस्थापनाबाबत जागरूकता तर वाढलीच, शिवाय संकटसमयी इतरांना मदत करण्याचा आत्मविश्वासही वृद्धिंगत झाला.
कार्यक्रमाचे सूत्रसंचालन शिक्षक विनोद चाफले यांनी केले, तर आभार प्रदर्शन महसूल विभागाचे सहायक महसूल अधिकारी प्रफुल देशमुख यांनी केले. यावेळी शारीरिक शिक्षक महेश वाघ, शिक्षिका संगीता शिरखेडकर आणि ग्राम महसूल अधिकारी कारेमोरे यांची उपस्थिती होती.
आपत्ती व्यवस्थापन दलाच्या पथकात हेड कॉन्स्टेबल अशोक निंबारते, महेश भावसार, प्रशांत वाघमारे, देवेंद्र कुमार, निलेश रेले, सुरेश कुमार एस, कॉन्स्टेबल शिरसाट नारायण, आवेश अली, विनोद कुमार जेडे, कुवर चरपटे, परसराम साहू, मंगेश बोरकर आदींचा समावेश होता.
Users Today : 11
Users Yesterday : 17