नेपाळच्या पुराच्या गाळात सापडला कोट्यवधींचा ‘खजिना’; ५० कोटींचे सोने, दीड कोटींची रोकड सुरक्षित

कृषी विकास बँकेची शाखा पुरात बुडाली

पोलिसांचे ८ तासांचे रेस्क्यू ऑपरेशन, चांदी व महत्त्वाची कागदपत्रेही वाचवली

काठमांडू : नेपाळमध्ये भोटेकोशी नदीला आलेल्या भीषण पुरामुळे मोठ्या प्रमाणात नुकसान झाले आहे. या पुराच्या पाण्यात नुवाकोट जिल्ह्यातील त्रिशूली परिसरातील कृषी विकास बँकेची शाखा पूर्णपणे बुडाली होती. पाणी ओसरल्यानंतर बँकेच्या शाखेत मोठ्या प्रमाणात गाळ आणि माती साचली होती. या गाळातून पोलिसांनी तब्बल ५० कोटी नेपाळी रुपयांचे सोने आणि सुमारे दीड कोटी रुपयांची रोकड सुरक्षित बाहेर काढली.

बँकेच्या शाखेत गाळाचे मोठे ढिगारे साचल्याने लॉकर आणि मौल्यवान वस्तूंपर्यंत पोहोचणे पोलिसांसमोर मोठे आव्हान होते. पोलिसांनी सुमारे ८ तास रेस्क्यू ऑपरेशन राबवत गाळ हटवला. त्यानंतर सोन्यासह चांदी, रोकड आणि इतर मौल्यवान वस्तू सुरक्षितपणे बाहेर काढण्यात आल्या.

याशिवाय बँकेतील महत्त्वाची कागदपत्रेही सुरक्षित ठिकाणी हलवण्यात आली. या कारवाईमुळे बँकेची कोट्यवधींची संपत्ती वाचवण्यात प्रशासनाला यश आले.

पुरामुळे नेपाळमध्ये मोठे संकट

भोटेकोशी नदीच्या पुरामुळे नेपाळमधील अनेक भागांमध्ये जनजीवन विस्कळीत झाले आहे. रस्ते, घरे आणि विविध परिसर पाण्याखाली गेले असून अनेक ठिकाणी चिखल व मातीचे ढिगारे साचले आहेत. त्यामुळे बचाव आणि मदतकार्याला मोठ्या अडचणी येत आहेत.

दरम्यान, नेपाळमधील या नैसर्गिक आपत्तीत आतापर्यंत ७८१ जणांचा मृत्यू झाल्याची माहिती देण्यात आली आहे. मोठ्या प्रमाणावर आर्थिक आणि भौतिक नुकसान झाले असून बचावकार्य तसेच पुनर्वसनाचे काम सुरू आहे. प्रशासनाकडून नुकसानीचा आढावा घेण्याचे कामही सुरू आहे.

0

0