नाशिक कुंभमेळ्यासाठी वृक्षतोड? साधू-संतांच्या नावाखाली पर्यावरणावर गदा

नाशिक कुंभमेळ्यासाठी वृक्षतोड? साधू-संतांच्या नावाखाली पर्यावरणावर गदा; कार्यकर्त्यांचा संताप

नाशिक | आगामी सिंहस्थ कुंभमेळा निमित्त नाशिकमध्ये शेकडो वर्षे जुनी झाडे तोडण्याची प्रक्रिया सुरू असल्याची माहिती समोर येताच पर्यावरणप्रेमी, सामाजिक कार्यकर्ते आणि धार्मिक समुदायाकडून तीव्र प्रतिक्रिया उमटत आहेत. साधू-संतांच्या तात्पुरत्या निवासासाठी जंगलातील वृक्षतोड केली जात असल्याचा आरोप कार्यकर्त्यांकडून होत आहे.

“साधूंसाठी झाडांची कत्तल? संत परंपरेचा अपमान” — कार्यकर्त्यांचा सवाल

पर्यावरणसंरक्षणासाठी सातत्याने काम करणारे अभिनेते सयाजी शिंदे यांनी झाडतोडीविरोधात नाशिकमध्ये जनआंदोलन छेडले आहे. वारकरी, दत्तसंप्रदायी, लिंगायत, महानुभावी आदी विविध संप्रदायांतील भाविकांनीही या निर्णयाचा विरोध करण्याची गरज असल्याचे ते सांगत आहेत.

त्यांच्या मते,

“आदीकालीन ऋषी-मुनी, साधू-संत यांनी कधीच आलिशान बंगल्यात साधना केली नाही. ते जंगलात, निसर्गाच्या सान्निध्यात राहिले. आज त्यांच्या नावाखाली झाडांची कत्तल केली जाते, ही परंपरेच्या विरोधातील गोष्ट आहे.”

धार्मिक कार्यक्रम की विलासी सुविधा?

कार्यकर्त्यांचा आरोप आहे की:

• कुंभमेळ्यासाठी साधूंच्या आलिशान राहुट्यांच्या सोयीसाठी मोठ्या प्रमाणावर झाडे तोडली जात आहेत

• पर्यावरणवादी, प्रतिष्ठित संस्था किंवा व्यक्ती या प्रश्नावर मौन बाळगत आहेत

• सरकारी सुविधांच्या नावाखाली अनावश्यक खर्च वाढत आहे

शिंदे यांचा सवाल स्पष्ट आहे —

“झाडांची सावली असताना साधूंसाठी जंगलातील झाडे तोडून आरामदायी निवासाची गरज काय? साधेपणा हीच संत परंपरेची ओळख.”

“मठाधीपतींच्या भक्तांनीच व्यवस्था करावी, सरकारी निधी वाचेल”

कार्यक्षेत्रातील अनेकांचा आग्रह आहे की:

• साधू-महंतांसाठी तात्पुरत्या झोपड्या उभारण्याची जबाबदारी त्यांच्या मठांच्या भक्तांनी उचलावी

• शासनाने फक्त मूलभूत सुवीधा पुरवाव्यात

• त्यामुळे लोकभावना सांभाळल्या जातील आणि पर्यावरणही वाचेल

• 

1967 चा संदर्भ: राष्ट्रसंत तुकडोजी महाराजांची कडक टीका

कुंभमेळ्याच्या इतिहासात 1967 मधील राष्ट्रसंत तुकडोजी महाराज यांचे उद्गार आजही तितकेच लागू पडतात. त्यांनी भजनातून साधूंना सुनावत म्हटले होते:

“साधू हॉटेलचा चहापाणी नाही हो…
साधूपण नसतं पंथात, तीर्थात किंवा वर्णात.”

त्यांच्या मते,

“जनकल्याण, सत्य आणि विश्वबंधुत्व हाच धर्माचा खरा आधार. असत्य मार्गाने सत्ता किंवा मान मिळवणे हा अधर्म.”

कार्यकर्त्यांची मागणी स्पष्ट

नाशिकच्या कुंभमेळ्याला विरोध नाही, पण पर्यावरणाचा बळी देऊन धार्मिक सोहळा साजरा केला जाऊ नये, अशी भूमिका कार्यकर्त्यांनी मांडली आहे. त्यांचा आग्रह:

• राज्यातील प्रमुख धर्मसंप्रदायांनी एकत्र येऊन शासनाचे लक्ष वेधावे

• कुंभमेळ्यात साधेपणा राखावा

• पर्यावरणाला धोका पोहोचेल असे निर्णय तातडीने थांबवावेत

“निसर्ग वाचवणे हेच भावी पिढीचे रक्षण आहे; धर्मप्रसाराच्या नावाखाली पर्यावरणाचा विध्वंस मान्य नाही.” 

: ज्ञानेश्वर दुर्गादास रक्षक
अभ्यासक राष्ट्रसंत तुकडोजी विचारधारा
9823966282

Author: कामगार टाइम्स

0

0