48 तासांत 4 शिरच्छेद मृतदेह; कैमूर जिल्ह्यात खळबळ

48 तासांत 4 शिरच्छेद मृतदेह; कैमूर जिल्ह्यात खळबळ

शरीराचे अवयव वेगवेगळ्या ठिकाणी सापडल्याने पोलिसांसमोर मोठे आव्हान

नागरिकांमध्ये भीतीचे वातावरण

कैमूर (बिहार) : बिहारमधील कैमूर जिल्ह्यात अवघ्या 48 तासांत चार शिरच्छेद अवस्थेतील मृतदेह आढळल्याने परिसरात मोठी खळबळ उडाली आहे. मृतदेहांचे अवयव विविध ठिकाणी विखुरलेल्या अवस्थेत सापडल्याने पोलिसांची चिंता वाढली असून नागरिकांमध्ये भीतीचे वातावरण निर्माण झाले आहे.

ही धक्कादायक घटना रामगढ पोलीस ठाण्याच्या हद्दीत घडली असून, आतापर्यंत पोलिसांनी चार अज्ञात मृतदेहांचे अवयव जप्त केले आहेत. मात्र, मृतांची ओळख अद्याप पटलेली नाही.

मंगळवारी रात्री उशिरा अभैदे गावाजवळ एका पोत्यामध्ये मृतदेहाचे अवयव आढळल्याची माहिती पोलिसांना मिळाली. त्यानंतर कैमूरचे पोलीस अधीक्षक हरिमोहन शुक्ला, मोहनियाचे एसडीपीओ प्रदीप कुमार यांच्यासह मोठा पोलीस बंदोबस्त घटनास्थळी दाखल झाला. पोलिसांनी परिसराची पाहणी करून पुरावे गोळा करण्यास सुरुवात केली आहे.

पोलिसांच्या माहितीनुसार, गेल्या दोन दिवसांत रामगढ परिसरातून चार शिरच्छेद अवस्थेतील मृतदेहांचे अवयव सापडले आहेत. 10 मे रोजी दुर्गावती नदीतून दोन अज्ञात मृतदेहांचे अवयव सापडले होते. त्यानंतर अभैदे गावाजवळ कर्मनाशा नदीच्या काठावर आणखी काही अवयव आढळून आले. या सर्व घटनांचा एकमेकांशी संबंध असण्याची शक्यता गृहीत धरून तपास सुरू करण्यात आला आहे.

मृतदेहांची अवस्था अत्यंत खराब असल्याने त्यांची ओळख पटवणे पोलिसांसाठी मोठे आव्हान ठरत आहे. पोलिसांनी जवळच्या जिल्ह्यांतील आणि विविध पोलीस ठाण्यांमध्ये नोंद असलेल्या बेपत्ता व्यक्तींच्या प्रकरणांची पडताळणी सुरू केली आहे.

प्राथमिक तपासात एक पुरुष, एक महिला आणि एका लहान मुलाचा मृतदेह असण्याची शक्यता व्यक्त करण्यात आली आहे. चौथ्या मृतदेहाबाबत अद्याप स्पष्ट माहिती मिळालेली नाही. पोस्टमार्टम अहवाल आल्यानंतर मृत्यूमागील कारण आणि संपूर्ण घटनेचा उलगडा होण्याची शक्यता पोलिसांनी व्यक्त केली आहे.

दरम्यान, परिसरात वाढत्या भीतीच्या पार्श्वभूमीवर रामगढ आणि आसपासच्या भागात मोठा पोलीस बंदोबस्त तैनात करण्यात आला आहे. नागरिकांना कोणतीही संशयास्पद माहिती मिळाल्यास तातडीने पोलिसांना कळवण्याचे आवाहन प्रशासनाकडून करण्यात आले आहे.