भीषण अपघातात केजचे तहसीलदार राकेश गिड्डे यांचा मृत्यू

बीड | प्रतिनिधी

भीषण अपघातात केजचे तहसीलदार राकेश गिड्डे यांचा मृत्यू

बीड जिल्ह्यातील केज तालुक्याचे तहसीलदार राकेश गिड्डे यांचा गुरुवारी पहाटे झालेल्या भीषण अपघातात दुर्दैवी मृत्यू झाला. लातूर-अंबाजोगाई महामार्गावरील रेणापूर फाट्याजवळ ही दुर्घटना घडली. या घटनेमुळे जिल्ह्यात शोककळा पसरली आहे.

नियंत्रण सुटल्याने कार पलटी

प्राथमिक माहितीनुसार, राकेश गिड्डे हे स्वतःच्या कारने प्रवास करत असताना पहाटे सुमारे पाच वाजण्याच्या सुमारास त्यांच्या वाहनावरील नियंत्रण सुटले. त्यानंतर कार रस्त्याच्या खाली घसरून पलटी झाली. अपघात इतका भीषण होता की, त्यांचा जागीच मृत्यू झाला.

घटनास्थळी मदतीचे प्रयत्न निष्फळ

रेणापूर पोलिसांनी दिलेल्या माहितीनुसार, अपघाताच्या वेळी ते गाडीत एकटेच होते. पहाटेची वेळ असल्याने परिसरात वर्दळ कमी होती. अपघाताचा मोठा आवाज ऐकून स्थानिक नागरिक घटनास्थळी पोहोचले आणि मदतीचा प्रयत्न केला, मात्र तोपर्यंत उशीर झाला होता.

कर्तव्यदक्ष अधिकाऱ्याच्या निधनाने हळहळ

राकेश गिड्डे हे कर्तव्यनिष्ठ आणि कामसू अधिकारी म्हणून ओळखले जात होते. त्यांच्या अकाली निधनामुळे महसूल विभागाला मोठा धक्का बसला असून सहकारी, मित्रपरिवार आणि नागरिकांकडून हळहळ व्यक्त केली जात आहे. या दुर्दैवी घटनेमुळे बीड जिल्ह्यात शोककळा पसरली असून अनेक स्तरांतून त्यांना श्रद्धांजली वाहण्यात येत आहे.

Author: कामगार टाइम्स

0

0