नागपूर : विषारी कफ सिरपमुळे मध्य प्रदेशातील छिंदवाडा जिल्ह्यात मुलांच्या मृत्यूचे सत्र सुरूच आहे. या सिरपमुळे मृत्यूमुखी पडणाऱ्या बालकांची संख्या दिवसेंदिवस वाढत आहे. बुधवारी सकाळी छिंदवाडा जिल्ह्यातील चौरई परिसरातील आणखी एक साडेतीन वर्षांची निष्पाप बालिका, अंबिका विश्वकर्मा, हिचा नागपूरमध्ये उपचारादरम्यान मृत्यू झाला. या मृत्यूमुळे मध्य प्रदेशात विषारी सिरप प्रकरणामुळे बळी पडलेल्या मुलांचा आकडा आता 26 वर पोहोचला आहे. सध्या आणखी दोन मुले नागपूरच्या रुग्णालयांमध्ये मृत्यूशी झुंज देत आहेत.

आतापर्यंत 26 निष्पाप जीवांचा बळी सर्व मृत बालके मध्यप्रदेशातील

                                              प्राप्त माहितीनुसार, चौरई तालुक्यातील ककई बिल्वा गावची रहिवासी असलेली अंबिका विश्वकर्माची तब्येत सप्टेंबर महिन्याच्या सुरुवातीला बिघडली होती. स्थानिक पातळीवर उपचार करूनही प्रकृतीत सुधारणा न झाल्याने कुटुंबीयांनी तिला 14 सप्टेंबर रोजी नागपूर येथील एका खासगी रुग्णालयात दाखल केले. तेथे डॉक्टरांनी तपासणीत तिचे मूत्रपिंड निकामी झाल्याची पुष्टी केली होती. सुमारे महिनाभरापासून तिच्यावर उपचार सुरू होते. अखेर बुधवारी सकाळी उपचारादरम्यान अंबिकाने अखेरचा श्वास घेतला. नागपुरात मृत्युमुखी पडलेली ही 18 वी केस असून, सर्व मृत बालके मध्यप्रदेशातील आहेत.

                         अंबिकाच्या मृत्यूमुळे राज्यात या विषारी सिरपमुळे बळी पडलेल्या मुलांची एकूण संख्या 26 झाली आहे. यापूर्वी, परासिया येथील मोरडोंगरी येथील रहिवासी असलेल्या एक वर्षाच्या गर्विक पवार याचाही नागपूरच्या मेडिकल कॉलेजमध्ये उपचारादरम्यान मृत्यू झाला होता. अशा प्रकारे सतत होणाऱ्या या मृत्यूंमुळे जिल्ह्यात एकच खळबळ उडाली आहे.

जागतिक आरोग्य संघटना (WHO) ने जारी केली एक आरोग्यविषयक सूचना 

                           दरम्यान, भेसळयुक्त कफ सिरपमुळे घडलेल्या गंभीर घटनांच्या पार्श्वभूमीवर, जागतिक आरोग्य संघटना (WHO) ने नुकतीच एक आरोग्यविषयक सूचना जारी केली आहे. या सूचनेद्वारे डब्ल्यूएचओने भारतात उत्पादित केलेल्या कोल्ड्रिफ (Coldrif), रेस्पीफ्रेश टीआर (Respifresh TR) आणि रीलाइफ (Relife) तीन खोकल्याच्या सिरपचा वापर आणि वितरण तातडीने थांबवण्याचा सल्ला दिला आहे. ही औषधे अनुक्रमे स्रिसन फार्मास्युटिकल्स, रेडनेक्स फार्मा, आणि शेप फार्मा यांनी तयार केली होती.

                          या सिरपच्या काही बॅचच्या तपासणीत, डायथिलीन ग्लायकॉल (Diethylene Glycol – DEG) हे विषारी रसायन निर्धारित प्रमाणापेक्षा खूप जास्त प्रमाणात आढळले आहे. हे रसायन मानवी शरीरासाठी अत्यंत धोकादायक आहे. DEG मुळे मूत्रपिंडाचे गंभीर नुकसान होऊ शकते, ते मेंदूवर विपरीत परिणाम करते आणि विशेषतः लहान मुलांमध्ये मृत्यूचा धोका निर्माण करू शकते.

डब्ल्यूएचओची जागतिक आरोग्य संस्थांना विनंती

                           या गंभीर धोक्यामुळे, डब्ल्यूएचओने जागतिक आरोग्य संस्थांना आणि तज्ज्ञांना विशेष विनंती केली आहे की, या कंपन्यांनी डिसेंबर 2024 नंतर तयार केलेल्या सर्व औषधांची कठोर तपासणी करण्यात यावी. तसेच, तपासणी पूर्ण झाल्याशिवाय कोणतीही औषधे बाजारात विक्रीसाठी उपलब्ध होणार नाहीत, याची काळजी घेण्याचे निर्देश देण्यात आले आहेत.