मेथॅनॉल भेसळीचा संशय; 112 हून अधिक जण रुग्णालयात दाखल | विषारी दारू शरीरातील रक्त आम्लयुक्त करून डोळ्यांची नस आणि महत्त्वाच्या अवयवांवर करते गंभीर परिणाम
भोपाळ : मध्य प्रदेशातील सागर जिल्ह्यात विषारी दारूमुळे मोठी दुर्घटना घडली असून, प्रशासनाच्या माहितीनुसार आतापर्यंत 22 जणांचा मृत्यू, तर 112 हून अधिक जण रुग्णालयात दाखल आहेत. काही रुग्णांची दृष्टी गेली, तर काहींचे शरीर निळे पडल्याचे समोर आले आहे.
या घटनेत मेथॅनॉल भेसळीचा संशय असून, विशेष म्हणजे 5 सप्टेंबर रोजी उत्पादन शुल्क विभागाने संबंधित दारू पिण्यास योग्य असल्याचा अहवाल दिला होता. त्यानंतर दुसऱ्याच दिवशी अनेकांना विषबाधा झाली.
क्षेत्रीय अधिकाऱ्यांवर तात्काळ कारवाई झाली, 5 अधिकारी निलंबित झाले, 30 हून अधिक नामजद आरोपींवर एफआयआर (FIR) दाखल झाला, 14 जणांना अटक करण्यात आली आहे, परवानाधारक ठेकेदार सिद्धार्थ कुशवाहा आणि यशवंत ठाकूर यांचाही आरोपींमध्ये समावेश आहे.
जबाबदार कोण?
या दुर्घटनेत बनावट दारूचा पुरवठा, संभाव्य मेथॅनॉल भेसळ आणि संबंधित यंत्रणेच्या तपासातील त्रुटी यांची चौकशी महत्त्वाची आहे. बनावट दारू तयार करणारे, पुरवठा करणारे आणि त्याकडे दुर्लक्ष करणाऱ्या संबंधित यंत्रणांची जबाबदारी निश्चित होणे आवश्यक आहे.
मेथॅनॉल म्हणजे काय?
दारूमध्ये वापरला जाणारा अल्कोहोल म्हणजे इथेनॉल. मात्र मेथॅनॉल हे औद्योगिक रसायन असून ते पिण्यासाठी अत्यंत विषारी आहे. ते इथेनॉलसारखे दिसते, त्यामुळे बनावट दारूमध्ये त्याची भेसळ झाल्यास सामान्य व्यक्तीला सहज ओळखता येत नाही.
मेथॅनॉल शरीरात गेल्यावर काय होते?
मेथॅनॉलचे शरीरात विघटन झाल्यानंतर फॉर्मिक ॲसिडसारखे विषारी पदार्थ तयार होतात. त्यामुळे रक्तातील आम्लता मोठ्या प्रमाणात वाढते आणि शरीरातील महत्त्वाच्या अवयवांवर गंभीर परिणाम होतो.
यामुळे—
- दृष्टी धूसर होणे किंवा पूर्णपणे जाणे
- तीव्र डोकेदुखी, उलट्या
- पोटदुखी व अशक्तपणा
- श्वास घेण्यास त्रास
- रक्तदाब कमी होणे
- शरीर निळे पडणे
- गंभीर अवस्थेत कोमा आणि मृत्यू
अशी लक्षणे दिसू शकतात.
महत्त्वाचे : दारू प्यायल्यानंतर लक्षणे उशिरानेही दिसू शकतात
मेथॅनॉल विषबाधेची लक्षणे अनेकदा काही तासांनी स्पष्ट होतात. त्यामुळे सुरुवातीला व्यक्ती ठीक दिसत असली तरी नंतर अचानक प्रकृती गंभीर होऊ शकते.
लक्षणे दिसल्यास काय करावे?
मेथॅनॉल विषबाधेचा संशय असल्यास वेळ न दवडता तातडीने रुग्णालयात दाखल करणे अत्यावश्यक आहे. स्वतःहून उलटी करण्याचा किंवा घरगुती उपचार करण्याचा प्रयत्न करू नये. गंभीर रुग्णांना डॉक्टरांच्या देखरेखीखाली विशिष्ट औषधोपचार आणि डायलिसिसची आवश्यकता भासू शकते.
0
0
