नवनिर्वाचित आमदार डॉ. राजीव पोतदार यांच्यासह लोककला क्षेत्रातील मान्यवरांचा होणार गौरव
सतीश पांडे | प्रतिनिधी
कळमेश्वर : सांस्कृतिक लोक कला मंच ऑल इंडिया यांच्या वतीने कळमेश्वर येथे भव्य जाहीर सत्कार सोहळ्याचे आयोजन करण्यात आले आहे. बुधवार, दि. 16 सप्टेंबर 2026 रोजी सकाळी 11 वाजता सावता मंदिर सभागृहात हा सोहळा पार पडणार आहे. विधान परिषदेचे नवनिर्वाचित आमदार डॉ. राजीव पोतदार यांचा यावेळी विशेष सत्कार करण्यात येणार असून, राजश्री शाहू महाराज वृद्ध कलाकार मानधन समितीच्या नवनिर्वाचित सदस्यांचाही गौरव केला जाणार आहे.
मान्यवरांची प्रमुख उपस्थिती
सावनेर विधानसभा मतदारसंघाचे आमदार डॉ. आशिष देशमुख यांच्या अध्यक्षतेखाली हा कार्यक्रम होणार आहे. माजी आमदार डॉ. मिलिंद माने, भाजप नागपूर ग्रामीण जिल्हाध्यक्ष मनोहरराव कुंभारे तसेच भाजपच्या महिला नेत्या प्रियाताई मानकर यांची कार्यक्रमाला प्रमुख उपस्थिती राहणार आहे.
वृद्ध कलाकार मानधन समितीच्या सदस्यांचा गौरव
यावेळी राजश्री शाहू महाराज वृद्ध कलाकार मानधन समितीवर नवनिर्वाचित झालेल्या संजय भाकरे, नाट्य कलावंत ज्ञानेश्वर भोयर, कीर्तनकार प्रकाश अदलाबदकर, प्रा. देविदास कठाने, लोककलावंत चेतन बेले, शाहीर प्रकाश काळे गुरुजी, नाट्य कलावंत किरण झाडे, प्रफुल फरकासे आणि लोककलावंत पुरुषोत्तम धोटे यांच्यासह विविध क्षेत्रांतील कलावंतांचा विशेष सत्कार करण्यात येणार आहे.
लोककलावंतांनी मोठ्या संख्येने सहभागी व्हावे
या सोहळ्यासाठी राज्य, विदर्भ, जिल्हा व तालुका स्तरावरील पदाधिकारी, शाहीर मंडळे, गोंधळ, भारूड, डहाका, भजन मंडळे, भीमगीत मंडळे, नृत्य कलावंत तसेच ढोलक, बँजो, तबला व हार्मोनियम वादकांनी मोठ्या संख्येने उपस्थित राहावे, असे आवाहन आयोजकांनी केले आहे.
कार्यक्रमापूर्वी सकाळी 9 वाजल्यापासून स्थानिक कलावंतांनी आपल्या मंडळासह वाद्यांसह उपस्थित राहून लोककलेचे सादरीकरण करावे, असेही आयोजकांनी नमूद केले आहे.
कळमेश्वर तालुक्यातील लोककलावंतांची एकजूट, त्यांच्या कलेचा सन्मान आणि पारंपरिक लोककलेच्या संवर्धनाचा संदेश देणारा हा सोहळा ठरणार असल्याची भावना आयोजकांनी व्यक्त केली आहे.
स्थळ : सावता मंदिर सभागृह, कळमेश्वर
दिनांक : बुधवार, 16 सप्टेंबर 2026
वेळ : सकाळी 11 वाजता
Author: कामगार टाइम्स
1
0
