झाडाच्या शेंड्यावर निवांत विसावलेला ‘वनपाहुणा’
गर्द हिरवाईत वानराची डुलकी; निसर्गाच्या शांततेचे मनमोहक दर्शन
मोहपा : सतत धावपळ, अन्नाचा शोध आणि समूहासोबतचा वावर यामध्ये व्यस्त असणाऱ्या वानरालाही विश्रांतीची गरज असते, याची प्रचिती मोहपा परिसरात पाहायला मिळाली. एका उंच झाडाच्या शेंड्यावर, निळ्याशार आकाशाच्या साक्षीने आणि हिरव्यागार पानांच्या सान्निध्यात एक वानर निवांतपणे डुलकी घेताना दिसले. या दृश्याने परिसरातील निसर्गप्रेमींचे लक्ष वेधून घेतले.
झाडाच्या सर्वात उंच फांदीवर बसलेले हे वानर जणू सभोवतालच्या जगापासून अलिप्त होऊन निसर्गाच्या कुशीत विसावले होते. सकाळच्या कोवळ्या उन्हाची ऊब अंगावर घेत, मंद वाऱ्याच्या झुळुकीत त्याची शांत मुद्रा पाहून अनेकांना क्षणभर थांबून हा निसर्गसोहळा अनुभवण्याचा मोह आवरला नाही.
सामान्यतः चपळ आणि चंचल स्वभावासाठी ओळखल्या जाणाऱ्या वानराला अशा शांत अवस्थेत पाहणे हा एक दुर्मीळ अनुभव ठरला. जणू काही झाडाच्या त्या फांदीनेच त्याला सुरक्षित आश्रय आणि आरामदायी शय्या दिली होती. निसर्गातील प्रत्येक जीवाला विश्रांती आणि शांततेचा हक्क असतो, याची जाणीव हे दृश्य करून देत होते.
म्हसेपठार (मोहपा) येथील शेतकरी भूषण सवाईकर यांनी हा दुर्मीळ क्षण आपल्या कॅमेऱ्यात कैद केला. त्यांच्या छायाचित्रातून वन्यजीवनातील सहजता आणि निसर्गाशी असलेले प्राण्यांचे अतूट नाते स्पष्टपणे जाणवते.
वन्यजीव अभ्यासकांच्या मते, उंच झाडांच्या फांद्या वानरांसाठी सुरक्षित विश्रांतीस्थळ ठरतात. अशा ठिकाणी त्यांना भक्षकांचा धोका कमी असतो तसेच परिसरावर लक्ष ठेवणेही सोपे जाते.
हे दृश्य पाहणाऱ्यांनी याला “निसर्गातील शांततेचे जिवंत चित्र”, “धावपळीच्या जीवनाला विश्रांतीचा संदेश देणारा क्षण” अशा शब्दांत प्रतिक्रिया दिली. खरे तर, झाडाच्या शेंड्यावर निवांत डुलकी घेत असलेले हे वानर माणसालाही एक संदेश देऊन जाते— कधी तरी थांबा, निसर्गाकडे पाहा आणि शांततेचा अनुभव घ्या.
📸 छायाचित्र ✍️ विशेष वृत्तांकन : भूषण सवाईकर M . 9764507440
0
0
