सोनम वांगचुक यांच्या उपोषणाचा १९वा दिवस

प्रकृतीबाबत दिल्ली हायकोर्टाची चिंता, विरोधकांचा केंद्रावर हल्लाबोल

हायकोर्टाचे दररोज वैद्यकीय तपासणीचे आदेश

केजरीवाल, डिंपल यादव, अखिलेश यादव, राज ठाकरे यांच्यासह विरोधकांचा पाठिंबा

नवी दिल्ली : NEET परीक्षेतील कथित गैरप्रकार आणि परीक्षा व्यवस्थेतील पारदर्शकतेच्या मागणीसाठी जंतर-मंतर येथे उपोषणावर असलेले सामाजिक कार्यकर्ते सोनम वांगचुक यांच्या उपोषणाचा गुरुवारी १९वा दिवस पूर्ण झाला. त्यांच्या खालावत चाललेल्या प्रकृतीची गंभीर दखल घेत दिल्ली उच्च न्यायालयाने केंद्र आणि दिल्ली सरकारला दररोज वैद्यकीय तपासणी करून आवश्यक उपचार उपलब्ध करण्याचे निर्देश दिले आहेत.

हायकोर्टाची भूमिका

सुनावणीदरम्यान न्यायालयाने “प्रत्येक नागरिकाचा जीव महत्त्वाचा असून त्याचे संरक्षण करणे ही सरकारची जबाबदारी आहे,” असे स्पष्ट केले. केंद्र सरकारच्या वतीने सॉलिसिटर जनरल तुषार मेहता यांनी सरकारी डॉक्टरांकडून वांगचुक यांच्या प्रकृतीवर सातत्याने लक्ष ठेवले जात असल्याचे न्यायालयाला सांगितले.

विरोधी नेत्यांचा सरकारवर निशाणा

वांगचुक यांच्या आंदोलनाला विविध विरोधी पक्षांच्या नेत्यांनी पाठिंबा दिला आहे.

• अरविंद केजरीवाल यांनी केंद्रीय शिक्षणमंत्री धर्मेंद्र प्रधान यांना पदावरून हटवून सोनम वांगचुक यांची शिक्षणमंत्री म्हणून नियुक्ती करण्याची मागणी केली.
• सपा खासदार डिंपल यादव यांनी जंतर-मंतर येथे भेट देत सरकारवर टीका केली आणि वांगचुक २० जुलै रोजी उपोषण सोडण्याची माहिती दिल्याचा दावा केला.
• अखिलेश यादव यांनी वांगचुक यांच्याशी दूरध्वनीवरून संवाद साधत आरोग्याची काळजी घेण्याचे आवाहन केले आणि NEET प्रकरणी केंद्र सरकारवर निशाणा साधला.
• राज ठाकरे यांनी सोशल मीडियावरील पोस्टद्वारे वांगचुक यांच्या आंदोलनाला पाठिंबा जाहीर करत परीक्षा व्यवस्थेत पारदर्शकता आणण्याची आणि जबाबदारांवर कारवाई करण्याची मागणी केली.
• चंद्रशेखर आझाद आणि इतर विरोधी नेत्यांनीही जंतर-मंतरवर भेट देत आंदोलनाला समर्थन दर्शविले.
• 

CJP ची शिक्षणमंत्र्यांच्या राजीनाम्याची मागणी

कॉकरोच जनता पार्टी (CJP) गेल्या २० जूनपासून जंतर-मंतर येथे आंदोलन करत असून, NEET पेपरफुटीप्रकरणी केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत आहे. सोनम वांगचुक यांनीही या आंदोलनात सहभागी होत आमरण उपोषण सुरू केले आहे.

प्रकृती खालावली

उपोषणाच्या १९ दिवसांत सोनम वांगचुक यांचे सुमारे ८.९ किलो वजन घटल्याची माहिती समोर आली असून, त्यांच्या प्रकृतीवर देशभरातून चिंता व्यक्त केली जात आहे. विरोधी पक्षांनी केंद्र सरकारने या प्रश्नावर तातडीने सकारात्मक भूमिका घ्यावी, अशी मागणी केली आहे.