भिवापूर : दृष्टीदोष व तिरळेपणा असलेल्या विद्यार्थ्यांवर तज्ज्ञ डॉक्टरांकडून उपचार, गरजू विद्यार्थ्यांना मोफत चष्म्यांचे वाटप

विद्यार्थ्यांच्या डोळ्यांची काळजी आता संस्थांच्या पुढाकारातून! भिवापूर तालुक्यात जिल्हा परिषद शाळांमध्ये नेत्र तपासणी मोहीम

माजी आमदार सुधीर पारवे फाउंडेशन व लक्ष्मणा बहुउद्देशीय संस्थेचा स्तुत्य उपक्रम; दृष्टीदोष व तिरळेपणा असलेल्या विद्यार्थ्यांवर तज्ज्ञ डॉक्टरांकडून उपचार, गरजू विद्यार्थ्यांना मोफत चष्म्यांचे वाटप

का टा वृत्तसेवा | रजत डेकाटे

भिवापूर : विद्यार्थ्यांचे आरोग्य हीच समाजाची खरी संपत्ती असून त्यांच्या उज्ज्वल भविष्यासाठी शिक्षणाइतकेच आरोग्यही महत्त्वाचे आहे. याच सामाजिक जाणिवेतून भिवापूर तालुक्यातील जिल्हा परिषद शाळांमध्ये शिकणाऱ्या विद्यार्थ्यांच्या डोळ्यांची तपासणी करण्याचा स्तुत्य उपक्रम हाती घेण्यात आला आहे. माजी आमदार सुधीर पारवे यांच्या पुढाकारातून सुधीर पारवे फाउंडेशन आणि लक्ष्मणा बहुउद्देशीय संस्था, भिवापूर यांच्या वतीने ही मोहीम राबविण्यात येणार आहे.

या उपक्रमांतर्गत तालुक्यातील जिल्हा परिषद शाळांमधील विद्यार्थ्यांची नेत्रतपासणी करण्यात येणार असून, तपासणीमध्ये दृष्टीदोष किंवा तिरळेपणाचा त्रास आढळणाऱ्या विद्यार्थ्यांना तज्ज्ञ डॉक्टरांच्या माध्यमातून योग्य उपचार उपलब्ध करून दिले जाणार आहेत. आर्थिक परिस्थितीमुळे चष्मा घेणे शक्य नसलेल्या गरजू विद्यार्थ्यांना मोफत चष्म्यांचे वाटप करण्याचाही संकल्प करण्यात आला आहे.

पंचायत समितीत नियोजन बैठक; आरोग्य व शिक्षण विभागाचा सहभाग

या उपक्रमाच्या प्रभावी अंमलबजावणीसाठी भिवापूर पंचायत समितीच्या सभागृहात नियोजन बैठक घेण्यात आली. बैठकीला सहाय्यक गटविकास अधिकारी, तालुका आरोग्य अधिकारी, ग्रामीण रुग्णालय भिवापूरचे वैद्यकीय अधिकारी, शिक्षणाधिकारी, विशेष शिक्षक तसेच भिवापूर, नांद, जवळी व सोमनाळा येथील आरोग्य अधिकारी आणि राष्ट्रीय बाल स्वास्थ्य कार्यक्रमाचे अधिकारी उपस्थित होते. विद्यार्थ्यांची तपासणी, नेत्रविकारांचे निदान, आवश्यक उपचार आणि गरजू विद्यार्थ्यांना चष्मे उपलब्ध करून देण्याच्या दृष्टीने या बैठकीत नियोजन करण्यात आले.

मोबाईलच्या वाढत्या वापरामुळे नेत्रआरोग्याचा प्रश्न ऐरणीवर

आजच्या डिजिटल युगात ऑनलाइन शिक्षण, इंटरॲक्टिव्ह बोर्ड, संगणक आणि मोबाईलचा वापर शालेय विद्यार्थ्यांच्या दैनंदिन जीवनाचा भाग बनला आहे. आधुनिक शिक्षणपद्धतीचे फायदे असले, तरी स्क्रीनसमोर वाढता वेळ आणि डोळ्यांच्या आरोग्याकडे होणारे दुर्लक्ष ही चिंतेची बाब ठरत आहे.

अनेकदा मुलांना दृष्टीदोष असूनही त्याची जाणीव होत नाही. वर्गातील फळा स्पष्ट न दिसणे, पुस्तक वाचताना अडचण येणे किंवा डोळ्यांशी संबंधित त्रास यांचा परिणाम त्यांच्या अभ्यासावर आणि आत्मविश्वासावर होऊ शकतो. त्यामुळे वेळेवर नेत्रतपासणी आणि आवश्यक उपचार मिळणे अत्यंत गरजेचे आहे. या मोहिमेद्वारे संभाव्य नेत्रविकारांचे वेळीच निदान करून विद्यार्थ्यांना योग्य उपचार मिळवून देण्यावर भर देण्यात येणार आहे.

पालकांनीही मुलांच्या डोळ्यांकडे दुर्लक्ष करू नये!

विद्यार्थ्यांची दृष्टी चांगली असेल तरच त्यांचा शैक्षणिक प्रवास अधिक सक्षम होऊ शकतो. त्यामुळे मुलांना डोळ्यांचा त्रास जाणवत नसला तरी नियमित आरोग्य तपासणीचे महत्त्व पालकांनी ओळखले पाहिजे. मुलांना सतत मोबाईल देण्याऐवजी मैदानी खेळ, पुरेशी विश्रांती आणि आरोग्यदायी सवयींना प्रोत्साहन देणेही आवश्यक आहे.

संदेश : एखाद्या गरजू विद्यार्थ्याला वेळेवर चष्मा मिळणे म्हणजे केवळ त्याची दृष्टी सुधारणे नव्हे, तर त्याच्या शिक्षणाचा आणि भविष्याचा मार्ग अधिक उजळ करणे होय. विद्यार्थ्यांच्या आरोग्यासाठी अशा जनहिताच्या उपक्रमांना समाज, पालक, शाळा आणि प्रशासनाने एकत्रितपणे साथ देणे ही काळाची गरज आहे.