📰 थोडक्यात बातमी : विदर्भ

📰 मराठ्यांना न्याय द्या; पण ओबीसींचे हक्क हिरावू नका : वडेट्टीवार

नागपूर : मराठा समाजाला न्याय देताना ओबीसी समाजाच्या हक्कांवर गदा येऊ नये, अशी भूमिका काँग्रेस नेते विजय वडेट्टीवार यांनी मांडली. दरम्यान, पंतप्रधान नरेंद्र मोदी यांच्या वाढदिवसानिमित्त भाजपने तेलाचे दिवे लावण्याच्या केलेल्या आवाहनावरही त्यांनी उपरोधिक टीका केली. जनतेला तेलाचा वापर कमी करण्याचा सल्ला दिला जात असताना दिवे लावण्याचे आवाहन करणे विसंगत असल्याचे सांगत, आज अनेकांच्या घरात खाण्यासाठी तेल उपलब्ध नसल्याचा मुद्दा त्यांनी उपस्थित केला.

📰 नागपूरची कायदा-सुव्यवस्था ‘रामभरोसे’; वडेट्टीवारांचे पोलिसांवर गंभीर आरोप

नागपूर : नागपूर शहरातील वाढत्या गुन्हेगारीवर काँग्रेस नेते विजय वडेट्टीवार यांनी चिंता व्यक्त केली. २०२६ च्या पहिल्या आठ महिन्यांत हिंसक गुन्ह्यांमध्ये ४३ टक्के वाढ आणि हत्येच्या प्रयत्नांचे १४७ गुन्हे दाखल झाल्याचा दावा त्यांनी केला. शाळा-महाविद्यालयांच्या परिसरातही ड्रग्स पोहोचल्याचे सांगत त्यांनी कायदा-सुव्यवस्थेवर प्रश्नचिन्ह उपस्थित केले. तसेच, काही पोलीस अधिकारी गणेश मंडळांच्या कार्यकर्त्यांना खोट्या गुन्ह्यांत अडकवण्याची धमकी देऊन पैशांची मागणी करत असल्याचा आरोप त्यांनी केला. या प्रकरणांची सखोल चौकशी करून गुन्हेगारीवर नियंत्रण मिळवण्यासाठी तातडीने उपाययोजना करण्याची मागणी वडेट्टीवार यांनी केली.

📰 अमरावती-परतवाडा महामार्गावरील जीर्ण झाडांमुळे अपघाताचा धोका; कृती समितीचा आंदोलनाचा इशारा

अमरावती : अमरावती-परतवाडा महामार्गावरील ब्रिटिशकालीन जुनी झाडे जीर्ण झाल्याने ती वाहनांवर कोसळून अपघात होण्याची भीती व्यक्त होत आहे. वाढत्या वाहतुकीच्या तुलनेत रस्ता अरुंद असून, अनेक झाडे आतून कुजल्याचा दावा करण्यात येत आहे. या पार्श्वभूमीवर परतवाडा-अमरावती रस्ता विकास कृती समितीने महामार्गाचे तातडीने रुंदीकरण व विकास करण्याची मागणी केली आहे. विकासकामांदरम्यान धोकादायक झाडे हटवून नवीन वृक्षलागवड करण्याचा पर्यायही समितीने सुचवला आहे. प्रशासनाने त्वरित उपाययोजना न केल्यास तीव्र जनआंदोलन छेडण्याचा इशारा समितीने दिला आहे.

📰 अमरावती जिल्हा मध्यवर्ती सहकारी बँकेची प्रारूप मतदार यादी आज जाहीर

अमरावती : अमरावती जिल्हा मध्यवर्ती सहकारी बँकेच्या (एडीसीसी) आगामी निवडणुकीच्या पार्श्वभूमीवर प्रारूप मतदार यादी आज, २१ सप्टेंबर रोजी प्रसिद्ध होणार आहे. यादीवरील हरकती व सूचना ३० सप्टेंबरपर्यंत स्वीकारण्यात येणार असून, आवश्यक छाननी व सुनावणीनंतर १४ ऑक्टोबरला अंतिम मतदार यादी जाहीर केली जाणार आहे. सध्याच्या २० सदस्यीय संचालक मंडळाची मुदत ४ ऑक्टोबरला संपत आहे. दरम्यान, निवडणूक कार्यक्रम वेळेत जाहीर न झाल्याने मंडळाने मुदतवाढीसाठी उच्च न्यायालयात याचिका दाखल केली आहे. बँकेवरील वर्चस्वासाठी राजकीय हालचालींना वेग आला असून, जिल्ह्यातील सहकार क्षेत्राचे लक्ष निवडणुकीकडे लागले आहे.

📰 लोणार सरोवर परिसरातील ९८.७ एकर जमिनीच्या फेरफाराची चौकशी करण्याची मागणी

बुलढाणा (लोणार) : लोणार सरोवर संवर्धनासाठी तसेच देवस्थानांच्या पूजा-अर्चा व देखभालीसाठी देण्यात आलेल्या सुमारे ९८.७ एकर जमिनीच्या मोजदादी, महसूल नोंदीतील फेरफार आणि भूसंपादन मोबदला वाटपात अनियमितता झाल्याचा आरोप लोणार पालिकेचे माजी उपनगराध्यक्ष राजेश श्रीराम मापारी यांनी केला आहे. या प्रकरणाची उच्चस्तरीय चौकशी करून मागील ५० वर्षांतील महसूल नोंदी तपासाव्यात आणि दोषींवर कारवाई करावी, अशी मागणी त्यांनी मुख्यमंत्री, महसूल मंत्री व वरिष्ठ अधिकाऱ्यांकडे निवेदनाद्वारे केली आहे. चुकीच्या पद्धतीने मोबदला वितरित झाल्याचे निष्पन्न झाल्यास संबंधितांकडून रक्कम वसूल करून शासनाच्या तिजोरीत जमा करावी, अशीही मागणी करण्यात आली आहे. प्रशासनाने तातडीने निर्णय न घेतल्यास आंदोलन व उपोषण करण्याचा इशारा मापारी यांनी दिला आहे

📰 ‘स्वप्नपूर्तीचे व्यसन बाळगा, अंमली पदार्थांना नकार द्या’; क्रिकेटपटू जितेश शर्माचे तरुणांना आवाहन

अमरावती : अमरावती ग्रामीण पोलिसांच्या ‘ऑपरेशन कवच’ उपक्रमांतर्गत ‘नॉट नॉर्मल’ या लघुपटाच्या टीझरचे अनावरण १९ सप्टेंबर रोजी मंथन हॉल परिसरात करण्यात आले. यावेळी आंतरराष्ट्रीय क्रिकेटपटू जितेश शर्मा यांनी तरुणांना अंमली पदार्थांपासून दूर राहून मोठी स्वप्ने पाहण्याचे आणि ती पूर्ण करण्यासाठी प्रयत्न करण्याचे आवाहन केले. अंमली पदार्थांचे व्यसन व्यक्ती, समाज आणि देशासाठी घातक असल्याचे सांगत त्यांनी पोलिसांच्या जनजागृती उपक्रमाचे कौतुक केले. ग्रामीण पोलीस अधीक्षक निकेतन कदम यांच्या संकल्पनेतून तयार झालेला सुमारे ४० मिनिटांचा ‘नॉट नॉर्मल’ लघुपट विद्यार्थ्यांसह नागरिकांमध्ये व्यसनमुक्तीचा संदेश पोहोचवणार आहे.