🔥 विलेपार्लेत भीषण आग; अडीच वर्षांच्या चिमुकल्यासह दोघांचा मृत्यू

११व्या मजल्यावरील आगीत चौघांना वाचवले; तिघा महिलांसह चौघांवर उपचार सुरू, आगीचे कारण अस्पष्ट

मुंबई : मुंबईतील विलेपार्ले परिसरातील शांता भवन या निवासी इमारतीच्या ११व्या मजल्यावर मंगळवारी रात्री सुमारे १० वाजण्याच्या सुमारास भीषण आग लागली. या दुर्घटनेत अडीच वर्षांच्या चिमुकल्यासह दोघांचा मृत्यू झाला असून, अन्य चार जण जखमी झाले आहेत. जखमींवर रुग्णालयात उपचार सुरू आहेत.

आगीची माहिती मिळताच अग्निशमन दलाचे पथक घटनास्थळी दाखल झाले. जवानांनी शर्थीचे प्रयत्न करून दोन महिला, एक पुरुष आणि एका मुलासह चार जणांची सुखरूप सुटका केली आणि त्यांना तातडीने रुग्णालयात दाखल केले.

नानावटी रुग्णालयाच्या सीएमओ डॉ. मुग्धा यांनी दिलेल्या माहितीनुसार, दुर्घटनेत एकूण सहा जण जखमी झाल्याची माहिती रुग्णालयाला मिळाली होती. त्यापैकी दोघांना रुग्णालयात दाखल केल्यानंतर डॉक्टरांनी मृत घोषित केले. मृतांमध्ये अडीच वर्षांचा अबीर आणि २३ वर्षीय अंकिता यांचा समावेश आहे.

दरम्यान, अग्निशमन दलाने आगीवर नियंत्रण मिळवले असून परिस्थिती नियंत्रणात असल्याचे महापालिका अधिकाऱ्यांनी सांगितले. आगीचे नेमके कारण अद्याप स्पष्ट झालेले नसून, याबाबत तपास सुरू आहे.

0

0