पक्षासाठी राज्यभर फिरलो, स्वतःच्या क्लासकडे दुर्लक्ष केले; कारवाईवर प्रश्न उपस्थित करत निवडणुकीनंतर भूमिका स्पष्ट करण्याचे संकेत
नागपूर | प्रतिनिधी : नागपूर विभाग पदवीधर मतदारसंघाच्या निवडणुकीच्या पार्श्वभूमीवर राष्ट्रवादी काँग्रेस पक्ष (शरदचंद्र पवार) यांनी नितेश कराळे गुरुजी यांची सहा वर्षांसाठी पक्षातून हकालपट्टी केली आहे. अपक्ष उमेदवारी दाखल करून पक्षशिस्तीचा भंग केल्याचा ठपका ठेवत ही कारवाई करण्यात आली. या निर्णयाचे वृत्त समोर आल्यानंतर कराळे गुरुजी यांनी आपली भूमिका मांडली. यावेळी ते भावूक झाले असून, शरद पवार यांच्याविषयी मनात प्रचंड आदर असल्याचे सांगतानाच त्यांनी कारवाईबाबत नाराजी व्यक्त केली.
पक्षासाठी मेहनत घेतली, पण कारवाईचे दुःख
कराळे गुरुजी म्हणाले की, पक्षाची भूमिका जनतेपर्यंत पोहोचवण्यासाठी आपण राज्यभर फिरलो. सभा घेतल्या, प्रचार केला आणि पक्षाच्या कामासाठी स्वतःच्या क्लासकडेही दुर्लक्ष केले. असे असताना आपल्यावर हकालपट्टीची कारवाई होणे चुकीचे वाटत असल्याची भावना त्यांनी व्यक्त केली. बोलताना त्यांचा कंठ दाटून आला आणि त्यांना अश्रू अनावर झाले.
संघर्षाच्या काळात नेत्यांनी विचारपूस केली नसल्याची खंत
सर्वसामान्य नागरिकांच्या प्रश्नांसाठी लढताना आपल्याविरोधात शंभरहून अधिक पोलिसांच्या केसेस दाखल झाल्या, दोन अॅट्रॉसिटीचे गुन्हे दाखल झाले आणि तुरुंगवासही भोगावा लागला, असा दावा कराळे गुरुजी यांनी केला. या कठीण काळात पक्षातील मोठ्या नेत्यांनी साधी विचारपूसही केली नाही, अशी खंत त्यांनी व्यक्त केली.
या कारवाईमागे काँग्रेसचा दबाव असण्याची शक्यताही त्यांनी व्यक्त केली; मात्र याबाबत कोणताही अंतिम निष्कर्ष मांडला नाही. निवडणूक संपल्यानंतर आपली भूमिका सविस्तरपणे स्पष्ट करणार असल्याचे त्यांनी सांगितले. जनतेच्या पाठिंब्यावर विश्वास व्यक्त करत त्यांनी मतदानातून जनता आपले उत्तर देईल, अशी अपेक्षा व्यक्त केली.
अपक्ष उमेदवारीमुळे पक्षाची कारवाई
पक्षाने जारी केलेल्या पत्रानुसार, महाविकास आघाडीचा अधिकृत उमेदवार विजयी व्हावा, यासाठी काम करणे ही पक्षाची राजकीय आणि नैतिक जबाबदारी आहे. मात्र, नितेश कराळे यांनी पक्षाच्या धोरणांच्या विरोधात जाऊन नागपूर विभाग पदवीधर मतदारसंघातून अपक्ष उमेदवारी अर्ज दाखल केल्याने पक्षशिस्तीचे उल्लंघन झाल्याचे पत्रात नमूद करण्यात आले आहे. त्यानुसार वरिष्ठ नेतृत्वाच्या निर्देशावरून त्यांची सहा वर्षांसाठी पक्षातून हकालपट्टी करण्यात आली.
मतदानाच्या तोंडावर झालेल्या या कारवाईमुळे राजकीय वर्तुळात चर्चेला उधाण आले आहे. एका बाजूला पक्षाने शिस्तभंगाचा ठपका ठेवला आहे, तर दुसऱ्या बाजूला कराळे गुरुजी यांनी आपल्या संघर्षाचा आणि पक्षासाठी केलेल्या कामांचा दाखला देत नाराजी व्यक्त केली आहे. आता निवडणुकीनंतर ते कोणती भूमिका घेतात, याकडे राजकीय वर्तुळाचे लक्ष लागले आहे.
📢 कामगार टाइम्स* बातम्या व जाहिरातीसाठी संपर्क
कार्यालय फ़ोन नं. 07118-272000/ 9404517414
Author: कामगार टाइम्स
0
0
