विजयन यांच्या निवासस्थानी ईडी पथकाला घेराव

समर्थकांकडून दगडफेक, वाहनांची तोडफोड

तिरुवनंतपुरम : केरळचे माजी मुख्यमंत्री Pinarayi Vijayan यांच्या निवासस्थानी छापा टाकण्यासाठी गेलेल्या अंमलबजावणी संचालनालयाच्या (ED) पथकाला संतप्त कार्यकर्त्यांच्या विरोधाचा सामना करावा लागला. ईडीच्या वाहनांवर दगडफेक करण्यात आली असून काही वाहनांच्या काचा फोडल्याची माहिती समोर आली आहे.

मनी लॉन्ड्रिंग प्रकरणाच्या चौकशीसंदर्भात ईडीचे १२ सदस्यीय पथक तिरुवनंतपुरम येथील बेकरी जंक्शन परिसरातील विजयन यांच्या निवासस्थानासह विविध ठिकाणी बुधवारी सकाळी पोहोचले होते. त्यावेळी विजयन आणि त्यांच्या कुटुंबीयांची उपस्थिती घरात असल्याचे सांगितले जाते.

छाप्याची माहिती समजताच मोठ्या संख्येने डाव्या पक्षाचे कार्यकर्ते आणि समर्थक घराबाहेर जमा झाले. ईडीचे अधिकारी कारवाई पूर्ण करून बाहेर पडत असताना संतप्त जमावाने त्यांच्या वाहनांवर दगड तसेच काचेच्या बाटल्या फेकल्या. काही वाहनांची तोडफोड करण्यात आली असून लाठ्यांचाही वापर झाल्याचे प्रत्यक्षदर्शींनी सांगितले.

हे प्रकरण विजयन यांच्या कन्या टी. वीणा यांच्या ‘एक्सालॉजिक सोल्युशन्स’ या कंपनीशी संबंधित आहे. आरोपानुसार, Cochin Minerals and Rutile Limited (CMRL) या कंपनीने २०१८-१९ दरम्यान एक्सालॉजिक सोल्युशन्सला सुमारे १.७२ कोटी रुपये मासिक देयकांच्या स्वरूपात दिले. मात्र, त्याबदल्यात कोणतीही प्रत्यक्ष आयटी अथवा सॉफ्टवेअर सेवा पुरविण्यात आली नसल्याचा संशय व्यक्त करण्यात आला आहे.

यापूर्वी आयकर विभागानेही या व्यवहारांवर प्रश्नचिन्ह उपस्थित केले होते. त्यानंतर ईडीने प्रतिबंधक मनी लॉन्ड्रिंग कायद्यांतर्गत (PMLA) २०२४ मध्ये गुन्हा नोंदवत चौकशी सुरू केली. या प्रकरणाची चौकशी सीरियस फ्रॉड इन्व्हेस्टिगेशन ऑफिस (SFIO) कडूनही सुरू असल्याचे सांगण्यात येत आहे.

दरम्यान, केरळ उच्च न्यायालयाने CMRL कंपनीची ईडी चौकशी रद्द करण्याची मागणी करणारी याचिका मंगळवारी फेटाळल्यानंतर अवघ्या एका दिवसात ही कारवाई करण्यात आल्याने राज्यातील राजकीय वातावरण तापले आहे.

विरोधकांनी या कारवाईकडे “राजकीय सूडबुद्धीने प्रेरित तपास” म्हणून पाहिले असून, केंद्र सरकारच्या संस्थांचा वापर विरोधी पक्षांवर दबाव टाकण्यासाठी केला जात असल्याचा आरोप डाव्या पक्षांकडून करण्यात येत आहे.