NTPC मधील कंत्राटी कामगारांच्या ESIC सुरक्षेचा मुद्दा ऐरणीवर!

पात्र कामगारांना आरोग्य विमा व सामाजिक सुरक्षा लाभ द्या

खासदार शामकुमार बर्वे यांच्याकडे प्रशांत मसार यांचे निवेदन

कन्हान | कामगार टाइम्स वृत्तसेवा

कन्हान : रामटेक लोकसभा क्षेत्रातील NTPC प्रकल्पांतर्गत विविध एजन्सी व कंत्राटदारांमार्फत कार्यरत असलेल्या कंत्राटी कामगारांच्या आरोग्य आणि सामाजिक सुरक्षेचा गंभीर प्रश्न ऐरणीवर आला आहे. पात्र कामगारांना कर्मचारी राज्य विमा निगम (ESIC) अंतर्गत आरोग्य विमा, वैद्यकीय उपचार आणि इतर कायदेशीर सामाजिक सुरक्षा लाभ मिळावेत, या मागणीसाठी सामाजिक कार्यकर्ते प्रशांत मसार यांनी खासदार शामकुमार बर्वे यांना निवेदन सादर केले.

NTPC प्रकल्पाच्या कामकाजात कंत्राटी कामगारांचे योगदान महत्त्वपूर्ण असतानाही त्यांना शासनाच्या कायदेशीर तरतुदींनुसार मिळणाऱ्या आरोग्य व सामाजिक सुरक्षा सुविधांबाबत स्पष्टता आणि प्रभावी अंमलबजावणी होणे आवश्यक आहे. सर्व पात्र कामगारांची ESIC अंतर्गत नोंदणी झाली आहे का, त्यांच्या वेतनातून व कंत्राटदारांकडून नियमानुसार विमा योगदान जमा केले जात आहे का, याची सखोल तपासणी करण्याची मागणी निवेदनातून करण्यात आली आहे.

केवळ कामगारांकडून काम नको, त्यांच्या सुरक्षेची जबाबदारीही घ्या!

निवेदनाद्वारे NTPC प्रशासन आणि संबंधित कंत्राटदारांना आवश्यक निर्देश देऊन प्रत्येक पात्र कामगाराला ESIC योजनेचा लाभ मिळवून देण्याची मागणी करण्यात आली आहे. यामध्ये सर्व पात्र कामगारांची विमा नोंदणी, विमा क्रमांक व ई-पहचान कार्ड उपलब्ध करून देणे, कामगार आणि त्यांच्या पात्र कुटुंबीयांना वैद्यकीय उपचार सुविधा देणे, तसेच आजारपण, कामाच्या ठिकाणी होणारे अपघात आणि अपंगत्वाच्या प्रसंगी मिळणारे कायदेशीर लाभ सुनिश्चित करण्यावर भर देण्यात आला आहे.

याशिवाय संबंधित सर्व एजन्सी व कंत्राटदारांकडून ESIC नोंदणी आणि विमा योगदानासंदर्भातील अहवाल मागवून त्याची पडताळणी करण्याची मागणीही करण्यात आली आहे.

कामगारांच्या हक्कांबाबत प्रशासनाने उदासीन राहू नये!

कंत्राटी कामगारांचे आरोग्य आणि सामाजिक सुरक्षा हा केवळ सुविधेचा विषय नसून तो त्यांचा कायदेशीर अधिकार आहे. प्रकल्पाच्या उभारणीपासून दैनंदिन कामकाजापर्यंत महत्त्वाची भूमिका बजावणाऱ्या कामगारांना आरोग्य विम्यासारख्या मूलभूत संरक्षणापासून वंचित राहावे लागणे ही गंभीर बाब आहे.

कामगारांच्या श्रमाचा लाभ घेणाऱ्या यंत्रणांनी त्यांच्या आरोग्याची आणि सुरक्षिततेची जबाबदारीही तितक्याच गांभीर्याने पार पाडली पाहिजे. NTPC प्रशासनाने या निवेदनाची दखल घेऊन पात्र एकही कंत्राटी कामगार ESIC आणि सामाजिक सुरक्षा लाभांपासून वंचित राहणार नाही, यासाठी तातडीने ठोस कार्यवाही करावी, अशी भूमिका प्रशांत मसार यांनी मांडली.

आता खासदार शामकुमार बर्वे या प्रश्नात किती प्रभावी हस्तक्षेप करतात आणि NTPC प्रशासन तसेच संबंधित कंत्राटदारांकडून प्रत्यक्षात कोणती कार्यवाही केली जाते, याकडे कंत्राटी कामगारांचे लक्ष लागले आहे.


📲 कामगार टाइम्स | बातमी आपल्या मोबाईल वर, थेट आपल्या गावातून

किशोर वासाडे : 📲 9423403810

0
0

Leave a Reply

Realted News