अमरावती हादरली! १८ वर्षीय तरुणीवर जंगलात सामूहिक अत्याचार

पाच आरोपी ताब्यात

अमरावती | क्राईम डेस्क – अमरावती जिल्ह्यात माणुसकीला काळिमा फासणारी संतापजनक घटना समोर आली आहे. भानखेडा रोडलगतच्या जंगल परिसरात १८ वर्षीय तरुणीवर पाच जणांच्या टोळीने सामूहिक अत्याचार केल्याने परिसरात तीव्र संतापाची लाट उसळली आहे.

                         मिळालेल्या माहितीनुसार, पीडित तरुणी आपल्या मित्रासोबत दुचाकीने जात असताना आरोपींनी त्यांचा रस्ता अडवला. त्यानंतर दोघांनाही लाथाबुक्क्यांनी बेदम मारहाण करण्यात आली. एवढ्यावरच न थांबता आरोपींनी तरुणीच्या मित्राकडील रोख रक्कमही जबरदस्तीने हिसकावून घेतली.

                         मारहाणीनंतर आरोपींनी तरुणीला जबरदस्तीने जंगलात नेऊन तिच्यावर सामूहिक अत्याचार केला. या अमानुष कृत्यामुळे संपूर्ण जिल्हा संतप्त झाला असून महिलांच्या सुरक्षेचा प्रश्न पुन्हा ऐरणीवर आला आहे.

                         घटनेची माहिती मिळताच फ्रेजरपुरा पोलिसांनी तातडीने हालचाल करत तपास सुरू केला. विशेष पथकाच्या मदतीने पाचही संशयित आरोपींना ताब्यात घेण्यात आले असून त्यांच्यावर कठोर कारवाईची प्रक्रिया सुरू आहे. अत्याचारानंतर पीडित तरुणीची प्रकृती खालावल्याने तिला तातडीने जिल्हा सामान्य रुग्णालयात दाखल करण्यात आले. सध्या तिची प्रकृती स्थिर असल्याची माहिती डॉक्टरांनी दिली आहे.

                        ही घटना केवळ गुन्हा नाही, तर समाजातील वाढत्या विकृतीचे गंभीर चित्र आहे. महिलांच्या सुरक्षिततेसाठी केवळ प्रशासन नव्हे तर प्रत्येक नागरिकाने सजग राहणे गरजेचे आहे. संशयास्पद हालचाली दिसल्यास तात्काळ पोलिसांना माहिती देणे, रात्रीच्या वेळी सुरक्षित मार्गांचा वापर करणे आणि एकमेकांना सहकार्य करणे ही काळाची गरज बनली आहे.

👉 अपराध्यांना कठोर शिक्षा मिळावी, हीच जनतेची एकमुखी मागणी आहे.