कारंजा ग्रामीण रुग्णालयात ‘जागतिक किडनी दिन’ उत्साहात;
मोफत डायलिसिस केंद्र ठरतंय रुग्णांसाठी जीवनदायी
का टा वृत्तसेवा I परमानंद मुदगल
कारंजा घाडगे : येथील ग्रामीण रुग्णालयातील महाडायलिसिस केंद्राच्या वतीने ‘जागतिक किडनी दिन’ विविध उपक्रमांनी साजरा करण्यात आला. या निमित्ताने रुग्णांमध्ये जागरूकता निर्माण करण्यावर विशेष भर देण्यात आला.
कार्यक्रमाला वैद्यकीय अधिकारी डॉ. सोनटक्के, डॉ. हिरुडकर, डॉ. दर्शना गोठाणे, विलास वानखडे आणि अनिल जयस्वाल हे प्रमुख पाहुणे म्हणून उपस्थित होते. महाडायलिसिस केंद्राच्या वैद्यकीय अधिकारी डॉ. पूनम जयस्वाल यांनी उपस्थितांचे पुष्पगुच्छ देऊन स्वागत केले.
यावेळी केंद्रातील रुग्णांनाही पुष्पगुच्छ देऊन त्यांच्या उत्तम आरोग्यासाठी शुभेच्छा देण्यात आल्या. आरोग्य मैत्रीण आरती वावरे, तंत्रज्ञ प्रणव पिल्लेवान, प्रतीक्षा विश्वकर्मा, स्टाफ नर्स श्वेता जवादे, मोहिनी कावरे, वॉर्डबॉय असीमभाई व दुर्गा डोंगरे यांनी रुग्णांशी संवाद साधत त्यांना मानसिक आधार दिला.
‘ सर्वांसाठी किडनी आरोग्य – लोकांची काळजी घेणे, ग्रहाचे रक्षण करणे’ ही २०२६ सालच्या किडनी दिनाची थीम असून, किडनीच्या आजारांविषयी जागरूकता निर्माण करणे, लवकर निदान आणि प्रतिबंध यांचे महत्त्व यावेळी अधोरेखित करण्यात आले.
विशेष म्हणजे, २ फेब्रुवारी २०२५ पासून सुरू झालेल्या या मोफत डायलिसिस केंद्राने अल्पावधीतच रुग्णांसाठी मोठा आधार निर्माण केला आहे. सुरुवातीला केवळ दोन रुग्णांपासून सुरू झालेली सेवा आता जवळपास २५ रुग्णांपर्यंत पोहोचली असून, आतापर्यंत सुमारे १३६० वेळा डायलिसिस प्रक्रिया येथे करण्यात आली आहे. अमरावती, नागपूर आणि वर्धा जिल्ह्यांतील रुग्ण येथे येऊन मोफत उपचार घेत असल्याची माहिती देण्यात आली.
कार्यक्रमाचे प्रास्ताविक विलास वानखडे यांनी केले, तर डॉ. सौरभ जयस्वाल यांनी शुभेच्छा व्यक्त केल्या.
विश्लेषण आणि मत
ग्रामीण भागात किडनीसारख्या गंभीर आजारांवरील उपचारांची सुविधा मर्यादित असते. अशा परिस्थितीत कारंजा येथील मोफत डायलिसिस केंद्र ही केवळ आरोग्यसेवा नसून अनेक रुग्णांसाठी जीवनरेखा ठरत आहे.
किडनीचे आजार अनेकदा उशिरा लक्षात येतात, त्यामुळे जनजागृती, नियमित तपासणी आणि वेळेवर उपचार अत्यंत महत्त्वाचे ठरतात. अशा उपक्रमांमुळे लोकांमध्ये आरोग्याबाबत सजगता वाढते आणि गंभीर आजारांपासून बचाव करण्यास मदत होते.
एकंदरीत, ‘जागतिक किडनी दिना’निमित्त आयोजित हा कार्यक्रम केवळ औपचारिकता न राहता, समाजासाठी उपयुक्त आणि संवेदनशील आरोग्य चळवळ ठरत असल्याचे चित्र दिसून येते.
0
0
