सरकारच्या प्रत्येक विभागात भ्रष्टाचार सुरू,
नरहरी झिरवळ आदिवासी असल्याने सापळा रचल्याचा आरोप – नाना पटोले
नागपूर : काँग्रेसचे ज्येष्ठ नेते आणि माजी प्रदेशाध्यक्ष नाना पटोले यांनी राज्य सरकारवर गंभीर आरोप करत, केवळ अन्न व नागरी पुरवठा विभागच नव्हे तर सरकारच्या प्रत्येक विभागात भ्रष्टाचार सुरू असल्याचा दावा केला आहे. तसेच, आमदार नरहरी झिरवळ हे आदिवासी असल्याने त्यांच्याविरोधात जाणीवपूर्वक सापळा रचण्यात आल्याचा आरोपही त्यांनी केला.
नागपूर येथे माध्यमांशी संवाद साधताना पटोले म्हणाले,
“सरकार स्वतःला स्वच्छ दाखवण्याचा प्रयत्न करत आहे. मात्र वास्तव असे आहे की, प्रत्येक विभागात पैसे दिल्याशिवाय सह्या होत नाहीत, हे सर्वांनाच माहीत आहे.”
जळगावातील 216 कोटींच्या केळी पीक विमा घोटाळ्याचा मुद्दा
यावेळी पटोले यांनी जळगाव जिल्ह्यातील कथित 216 कोटी रुपयांच्या केळी पीक विमा घोटाळ्याचा मुद्दा उपस्थित केला. त्यांच्या मते, सॅटेलाईट इमेजरीच्या मदतीने हा घोटाळा उघडकीस आला असून,
“पीक नसतानाही हजारो बनावट अर्ज दाखल करण्यात आले. या संपूर्ण प्रकरणात सरकारचा सहभाग असल्याचा संशय आहे.”
पटोले यांनी आरोप केला की, प्रामाणिक शेतकऱ्यांना पीक विम्याचा लाभ मिळत नाही, तर बीड आणि जळगावसारख्या जिल्ह्यांत सत्ताधाऱ्यांशी संबंधित लोकांना शासनाच्या माध्यमातून पीक विमा दिला जातो. या प्रकरणातील पुरावे विधानसभेत सादर करणार असल्याचेही त्यांनी स्पष्ट केले.
नीतीमूल्य समितीवर प्रश्नचिन्ह
राज्य सरकारने स्थापन केलेल्या नीतीमूल्य समितीवरही पटोले यांनी टीका केली. शासकीय दौऱ्यावर असताना आमदारांचे आचरण कसे असावे, यासाठी ही समिती आचारसंहिता तयार करणार आहे.
“एकीकडे भ्रष्टाचार होतो आणि दुसरीकडे समित्या स्थापन केल्या जातात. मग निवडणुकीच्या काळात मोठ्या प्रमाणावर होणाऱ्या पैशांच्या वाटपावर समिती का स्थापन केली जात नाही?” असा सवाल त्यांनी उपस्थित केला.
परभणीतील महापौर वादावर भाष्य
परभणी महापालिकेत उबाठा गटाकडून मुस्लिम महापौर निवडल्यावर सुरू झालेल्या राजकीय वादावर बोलताना पटोले यांनी उपरोधिक टिप्पणी केली.
“तिथे सलमान खानला महापौर केले असते, तरी भाजपला थंड वाटले असते का?” असा सवाल त्यांनी उपस्थित केला.
ते पुढे म्हणाले,
“संघाच्या कार्यक्रमाला गेलेला मुस्लिम शुद्ध आणि शिवसेनेचा मुस्लिम अशुद्ध, असे भाजपचे धोरण आहे का?”
नागपूरमधील प्यारे खान यांना मोठ्या पदांवर बसवून मोठे ठेके दिले जात असल्याचा आरोप करत,
“दुसऱ्यांवर बोट दाखवण्याआधी स्वतःकडे पाहावे,” असेही पटोले म्हणाले.
निवडणुकांबाबत भाकीत
आगामी विधान परिषद किंवा राज्यसभा निवडणुकांबाबत बोलताना पटोले म्हणाले की,
“काँग्रेसला कोणताही फटका बसणार नाही, कारण आमच्याकडे गमावण्यासाठी काहीच नाही. उलट महायुतीला मोठे नुकसान सहन करावे लागेल. महायुतीतच सर्वात मोठा घोळ होईल.”
पार्श्वभूमी
राज्यात विविध विभागांतील कथित भ्रष्टाचार, पीक विमा योजनांतील अनियमितता आणि आदिवासी प्रतिनिधींवरील कारवाई यावरून सध्या राजकीय वातावरण तापले आहे. मात्र सरकारकडून या आरोपांवर वेगळी भूमिका मांडली जाण्याची शक्यता आहे.
0
0
